L’ome inte deûs-adjes èt sès deûs mêtrèsses

| oteur = Jean-Joseph Dehin | eplaideu = Antolodjeye Piron p. 167

On vî djônê tot sètch, coleûr di peûve èt sé, dit : « Volà m’ tins passé, fåt tûser å marièdje. » Il aveût dès-êdants comptants; ossi pus d’eune lî voléve plêre. Vèyant çoula nost-ome ni s’ala nin håster, pawou dè piède si housse, å min.me tins s’ liberté, ca bin tchûsi n’èst nin ‘ne pitite afêre. Deûs vèves surtout loukît di l’andoûler. Eune èco rècokès’ èt l’ôte on pô fôcake, mês qui saveût s’ rafistoler èt catchî qu’èlle aveût fêt s’ dag’. Cès deûs marôyes-là tot tchinelant, tot qwèrant à lî fé dè l’ fièsse, èl carèssît atot l’ wåkant, dji vou dîre ratîtotant s’ tièsse. Li vèye à tot moumint tchipotéve è s’ toupèt èt lî råyîve po s’ pårt sès saqwants neûrs tchivès po qui s’ galant fouhe à si-îdèye. Li djône râyîve tos lès tchènous. Èle fèrît tant par djaloserèye, qui l’ome eûrit ‘ne tièsse come on cou. S’aparçûvant dè toûr, i dit : « Halte, mès marôyes ! Vos m’avez bin tondou, mês v’s-ârez totes lès deûs ‘ne coûte djôye, ca dj’î a pus’ wågnî qui dji n’î åye pièrdou. Afêre di marièdje, rin n’ mi prèsse, dji troûverè todi bin ‘ne ahèsse. Li cisse qui dji sposereû mi vôreût govièrner, fåreût qui dji m’ lèyahe miner. Nèni, merci, mågré qui dji seûye d’ine bone påsse, i n’ mi convêrè måy qui m’ feume pwète li cou-d’-tchåsses. »