Lu scayton su lève vès 7 eûres ô matin. I d’june, tins k’ sa fame aprète sa malète, k’i loume ossi s’ satch. Ele î mèt in bindon d’ cafè, dou pwin, avu ène âmelète, in curton d’ lôrd, û öte tchöse.
Lu travaye ôs scayîres, cumèce a 8 eûres. Mês lès ovrîs arivèt in pö d’vant, pasku l’ fossî (ouvrier de la fosse) dèt aprèter su kinkèt, ki loume pa dès cöps « posson ». I dèt rassan.ner sès ustîs, èt aler r’kèru lès cés k’astint an rèparâcion al fwâtche. Lès ovrîs du dzeus, d’vèt zês ossi, aprèter leûs ustîs.
Lès fossîs duch’chindèt ou tchèriot. Lu tchèriot c’èst ène sörte du doube « plate-förme » ficsêye su deus rayes. Cate rayes duch’chindèt la dusvalêye djusk’ô fond du trö. Ou plafond, deus poulîes toûrnèt an sans contrêre, yène ou dzeus du tchèke pwêre du raye ; pou dusroûler èt anroûler lès plats câbes, trèssés, an acî, ki sont acrotchés, yink ou tchèriot ki duch’chind, èt l’öte ou tchèriot ki r’monte.
In fin fil d’acî r’monte dou fond du trö, djusk’a ène pitite clotche pindûe ou dzeus ; èle siêve ôs ovrîs ki travayèt dins l’ fond, pou souner l’ machinisse ki diridje la maneûve du dzeus, k’ène bène (wagonnet), û in lori èst prèt su l’ tchèriot, pou z-èsse rumonté.
Vès nûve eûres èt d’mi, dîje eûres, lès scaytons câssèt la crousse : lès fossîs, dins l’ fond, èt lès cés du dzeus, al barake. Pou marèder, vès mîdi, is alèt tourtous ô rèfèctwâre, ûdon a leus môjons, cand la scayîre èst ô mitant d’in viadje. Lu travaye arète a cink eûres al nute.
Lu scayton s’ mousse in pö come tous lès ovrîs.
Mês a sès pîds, lu fossî, tchôsse dès « bout’fiêr » : c’èst dès solés avu la bètchète fèrêye, èt avu ène ligne du clôs inte lu talon èt la s’mèle. Avu cès clôs la, lu pîd du scayton tint bin s’ lès boûssons dès chôles (échelles). Si i mèt dès botes, èles duvèt ossi z-èsses fèrêyes.
Lu caske dèt z-èsse pwârtu pa tous lès ovrîs.
Lès ovrîs ki travayint ou dzeus, mètint, dins l’ tins, dès sabots, û dès galotche. Asteûre, i mètèt dès solés come tous lès ötes ovrîs.
Lu travaye dou fond, dusêwe lu fossî. Il è adon toudi brâmint yôk pou bwâre dins la malète. L’ pus souvint, c’èst du cafè ku lu scayton bwât cand il è sè. Mês dins l’ tins, mwintes ovrîs avint ène boutîye d’ goute dins la malète, min.me si s-ç’astot dusfindu p’ô Dirècteûr. Lès scaytons an buvint vlètî tins k’i travayint, èt co brâmint après.
Tins k’i travayint, c’èst lès boumes ki lzî apwârtint yôk a bwâre. Lès boumes alint al rokîe. La rokîe, ç’astot l’ pus souvint la goute.
Al nute, an rintrant a leus môjons, lès scaytons r’passint ô cabarèt, ou cafè. I gn-avot kékes inks, s’ lès routes dès scayîres ; lès tchèpèles, come on lès loumot. Enute, on n’ bwât pus d’ goute cand on travaye ; mês a l’ocâsion, on n’ rufuse nin in ptit vêre al fin du l’ djoûrnêye.
Lès accidants, astint râre ôs scayîres : lu chisse n’èst nin si vicieû kul tchèrbon. Gn-è bin pa dès cöps èn ovrî ki tumot :
- cand on d’jot k’in fossî avot bèrôdé, c’èst k’il avot rudvaler èt r’bondi, an trwâs, cate cöps ;
- cand on d’jot k’il avot caroûyé, c’èst k’il avot tumé d’assez höt, come s’il avot dusvalé d’in talus ;
- cand on d’jot k’il avot fwêt in coupirè, c’èst k’il avot culbuté.
D’après « Lès ardoisières de Warmifontaine » de Chantal Homel, mémoire de Philologie romane de l’ U.C.L., 1977-78, p.115, « Vie quotidienne ». Adapté an walon dès Basses-Ardènes par Pîre Otdjâke.