LES LEUS EIÉT LES BERBIS.
Aprét copu d’mille ans, dé n’guerre à tout s’quetté,
Lés Leus ét les Berbis, v’lint fai n’pai, eiét l’chure ;
Pou n’pu s’pourchure eiét s’destrure ;
I gagnint tous lés deux, pau mârchi à toppé :
Si l Leu strannét n’Berbis, ou in Agna à l’tette,
Lés biergis avét spia s’féyint pu d’enne casquette,
Gilèt, carnassière ét malette !
Si lés Bedots nousint gibotter dain l’pachi,
Les Leus pourchû étout, n’estint né n’mie rachîs !
A l’fin v’la l’pai qu’est s’tintindue,
Les Leus léye nu leû jônnes, pou garants qu’on d’estins,
Et lés Berbis donne nu leû chins !
L’notaire scrî les papis, on li paye ess’bin v’nue,
Et l’affaire est keudue.
Lés jônnes dé Leus crèche nu, comince nu â couri,
– Effant d’chat mougne volti sori ! –
I sinte nu lés Bédots, eiét qu’il ont dés broques :
Qui n’sont né là, pou ieuses mougni des loques ?
Tins q’lés biergis d’leû s’taule estint vudi,
I l’apougne nu leû biesses, lés s’tranne nu au pu rade,
Et dain leû dints, pa l’pia d’leû dos,
Lés sat’che nu sain l’achi dain l’bot !
Lés vîs Leus avint vint, du plan et d’l’algarade,
Eiét dé l’régalade !
Su l’tins q’lés chins fieint leû niquét,
Saîn crii gare il’z’ont strannét
Eiét nia né iun qu’a scappet !
Nia rin d’si bia qué l’pai ! înte payi quelle sè fasse,
Mai d’vint i faut pourchure, déstrure pu d’enne moèche rasse,
À s’touffi l’progrét, l’scieince, qu’on voét co s’adayi
Pou r’mette leû vie coéyince à l’plasse !
Qui intertene nu l’brouye ét l’guerre, intrét payi,
Maugrét q’d’el’guerre lés geins sont lasse !
Plasse, honneûre, goère, argint, i voule nu tout satchi,
I voule nu spochi l’peupe, iesse tout seû moèsés, lés losses !
Pa leû loés et leû liards, i n’cache nu q’plaie et bosses !
L’pai, l’doét, l’égalité, d’ieuses in fau né l’cachi !
L’progrét, l’raisô, doève nu, leû fai l’guerre sain lachi.