In con k’i l-arivet avu leus grands tchapês
Leus camisolles du cûr ki sîjet les tropês
Les berdjîs
Doulmin k’ l’iviêre èst oûte, (i) montet aus pastèratches
Pîs kand l’iêbe èst toute rousse, i r’dusvalet ou viatche
Les berdjîs
Sul’ tin k’ leus biêsses buvet, d’vant enne jatte du lassê,
I l-apougnet enne zûne su la flûte du djonkê
Les berdjîs.
Les pus vîs counichet et tant et tant d’ cayets
Ku toute chîje i contet ; et les djönes[1] djins choûtet
Les berdjîs
Yinke nun est[2] k’ pou ses djâles et ses bébés crotchets[3]
K’ après, trwâs nuttes au lon[4], les leus wârous v’ hapet.
Les berdjîs
In öte counut des flôwes a picher al maronne
A s’ kucheure du plêji, a fére rire les bobonnes,
Les berdjîs.
Et pîs gn’èst [5] des bês djönes k’ont des oûyes si spitants
Ku les couméres du viatche ès roviet leus galants
Les berdjîs
Des oûyes ki les dusbiet, des ouys k’ elles vörint bin
Awère duvant leus oûyes jusk’ a d’mwin au matin
Les berdjîs
Leu rire èst si sclatant k’ on crwârot stritcher l’êwe
Et leus mwins sont si felles k’elles frint monter la sêwe
Les berdjîs.
C’èst k’i nous duszôrmiet, les djönes hommes, les couméres
Quand inte zês et nous-ötes, faut drovu la bariére
Les berdjîs
Avu enne pîce du pwin, des crompires cûtes al bréje,
On èst tèlmint binauche k’on l’sî dêrot des fréjes
Aus berdjîs
Et des djiayes[6] du Noyé, des hôves[7] du Nouvel-an
Pou k’i nous djinge[8] capâbes du les sîre dins les tchans
Les berdjîs, les berdjîs, les berdjîs.[9]