LES BIESSES MALADES DU COLORA-MORBUS.
In mau qui fout l’vesse à lés geins !
Qué l’ Bon Diœu dain in m’wai momint,
Invinta pou puni tous nôs p’tits coups d’jônnesse !
Ell’Colora Môrbus !! mot qui vo fai frumi,
Pa qui s’qué l’cimintierre aurét sti rade rimpli,
Estét cheû sû les paufes é biesses !
I n’crévint né t’tertous, mai tertous bin jôndus,
Il avint l’aire si bien pierdus !
Qui n’cachint né seûlemin, à s’soulagi n’miette,
Et il estint tertous à l’diette !
Lés R’naus n’montint pu leû plans,
Pou d’esplômé lès crasses é pouyes !
Lés Arondes foutint leû camp,
T’taussi péneuses qué dés Guernouyes !
— Ell’ Lion bat l’rappel ! î dit : « choutét vi stos,
« L’Bon Diœu fai chaire su no dos,
« Pou nô puni, enne m’waiche histoère !
« Qué l’pu arsouye dé tout l’payi,
« Aye ess’rinde au Bon Diœu, pou fai s’cappé l’zamis,
« Et p’tette qué no s’ront d’jà, tout rapopiis au soère !
Et m’pa Françoet m’a dit : qué dain lés pû dûrs tins,
C’est s’tainsi qu’on fiét l’pû souvint.
« Ainsi n’couyonnons né ! et d’sons comme à confesse,
« Les pèchés q’no z’avons dain l’tiesse :
« Pour mi, pou rapogi dé tins-zin-tins m’foim d’sot,
« J’ai strannét copu d’cint Bédots !
« Quoé s’qui m’avint fai ? né l’moînde poène !
« Quéque foés, jé n’mè su né même ginnét pou mingi
Ell’Biergi !!
« Jé su contint d’mori, si i faut, mai i m’chenne,
« Qué comme mi i faurét, q’tout l’monde fuche intindu,
« Pasqué vo sintét bin, q’pou iesse jusse i fau pinde :
« Ell’pu grand vaurin d’toute ell’binde : »
— Lé R’nau respond : « Vo stét in Roé comme i n’dia pu !
« On coéret q’vo woétét tout ça pou n’saquoé d’rare,
« Et bin mingét Bédot, Pourchat, ou bin canare,
« Fri mau pou ça ? Non fai, i doève nu iesse contints.
« Dé s’sinti machi pa vo dints !
« Et pou l’biergi i m’chenne, à m’noye :
« Q’vo z’avét bin fai d’l’amanchi,
« Pasqué c’estét co iun, qui n’savét s’inpéchi :
« D’fai brère lés paufes é biesses, in leu foutant dés douyes ! »
— Là d’sû tout l’monde sadaye, à fel clachi des moins !
On n’ousét né woéti brammin,
Lés fârces du Tique et d’l’Ourse, etiét des autes é biesses,
Qu’on n’sintét né volti leû gesses !
Les sins qu’avint dés broques, eiét même tous lés chins,
Passint co pou iesses sâches, quoé q’cestèt dés vaurins !
Arrife in vî Baudet, qui v’nèt d’Monseûmarciennes,
Il estèt copu vi q’les ch’moins !
Il avét travayi, quinze ans, kerchant d’zèspennes.
Il estét boigne, eiét sain dints :
— « Jé m’souvins bin, disti, qu’in r’vénant dé l’ducasse,
« Paû pachi du mayeure Tâhon,
« Jé crévét d’foin et d’soéf ! eiét j’estét si lasse !
« Et p’tette du Diâle ell’tintâtion,
« J’ai coudu deux toés zieppes, mai, né pu d’enne pougnie,
« Pou ça jaurét pu iesse, r’moinnét à Châléroét ! »
— La d’sû lés biesses crie nu : Qu’on apougne ell’Baudet !
Et mouton Cigognî, l’pu fin dé l’compagnie,
Qu’estét r’vénu d’Boufiou, ousqu’il avét studii,
A parlet copu roét q’l’avocat Toéscoupri !
Il a s’ti r’quai d’z’artiques, pou miœu moustré q’l’affaire,
Estét brammin pu m’waiche, qu’on avét l’aire dé l’coére !
« Qu’on d’vét absolumint sacrifii l’vî Baudet !
« Q’cé n’estét qu’in pouyieux, pou qui s’qué l’monde crévét !
— On l’l’a rade condannét : à avoé s’tiesse coupée !
« Mingi lieppe du mayeure ! qué crime ! enne do Nénée ?
On l’là guiyiotinet, ell’l’ed’moin au matin,
Dain l’cour Bobo Lionard ! eiét d’vint n’masse dé geins !
Ça s’ti même Pierre Chiau, qu’a sti sat’chi l’ficelle,
Pou sés poènes il a ieu, enne belle paire dé burtelles !
C’est pou vo dire Françoét ; qué quand on z’est n’saquoé,
On pou fai tout s’qu’on vout ! on n’est né rade pincét !
Mai, quand on z’est sain liards, et r’vingi pa personne,
On a toudi pierdu ! quand l’affaire s’rét co bonne.