Quand dji fréquenteus Ziréye,
Dji m’ diseus : « In côp mariè,
Ele s’ra m’ pètite adoréye,
Mi dji s’raipè s’ titgâtè ! »
Gn’aveut pont d’ méyeûse èfant
Au Printenps,
Ele fieut toutes mes volontés
Dins l’Esté,
Ele asteut vraimint mignone
Dins l’Automne,
Ele m’ap’leut : « S’ n’amour si cher »
Dins l’Hiviér,
Ele tchanteut come in pinson
Dins toutes les saisons.
Mins l’ mariâtche est-ène bièstrîye,
Djèl vwès seul’mint conpagnon ;
M’ feume si boune èstant djône fîye
Est d’vènûwe in vrai démon.
Ele mi traite di fainéant
Au Printenps,
Di grand lâche et d’ monnestés
Dins l’Esté,
Di sauléye, d’ fouteû d’ tanpone
Dins l’Automne,
Di sâle flamind et d’ plin d’ viêrs
Dins l’Hiviêr,
Ele est co pîre qu’in pwèson
Dins toutes les saisons.
Quand nos fréquentunn’t èchène,
L’ propreté ç’asteut s’ passion ;
Mins asteûre toute èl samwène
Ele est pus nwêre qu’in tcherbon.
Ele mindje des boules, des fondants
Au Printenps,
Du nougat, des p’tits pâtés
Dins l’Esté,
Des bablutes, dèl taute à prones
Dins l’automne,
Du chocolat come dessert
Dins l’Hiviêr,
Des couyes di Suisses, des restons
Dins toutes les saisons.
Vraimint c’est bén dèl misére,
M’ feume m’erbute tout come in tchén ;
Ele si met dins des coléres
Pou des pètchias, pou des réns.
Dj’atrape des brognes di m’ carcan
Au Printenps,
Des doublures à tout s’quèter
Dins l’Esté,
Des danses qui dj’ chîs dins m’ marone
Dins l’Automne,
Des côps d’ ramon ou d’ tchaud fiêr
Dins l’Hiviêr,
Dj’ai toudi du rigodon
Dins toutes les saisons.
Mins çu qui m’ fait co l’ pus d’ pwène,
C’est qui m’ feume a des galants ;
Ele d’a co pus d’ène douzène,
Qwè d’ séz di s’ tanpèrament ?
Ele èrçwèt Pière et Fernand
Au Printenps,
Françwès, Djôsef et Noé
Dins l’Esté,
Gn’a toudi yun qui fonctione
Dins l’automne,
C’est Djacques ou bén c’est Flubert
Dins l’Hiviêr,
Dji dè pôrte d’in mète di long
Dins toutes les saisons.
Em’ feume n’est jamais contène,
Tout c’ qu’èle vwèt èle vout l’ach’ter ;
Et quand dj’ rapôrte èm’ quinjène
Ele ni rêve qu’à l’ dispinser.
C’est des bagues et des pindants
Au Printenps,
Des cotes et des jaunes solés
Dins l’Esté,
Des tchapias come ène barone
Dins l’Automne,
Des fourures, tout c’ qu’i gn’a d’ tchièr
Dins l’Hivièr,
Ele brichaude mes picayons
Dins toutes les saisons.
Mins dji sû trop misèrâbe
Et dji m’ va tout planter là,
Em’ feume s’èdira au diâbe
Tirer s’ plan come èle voura.
Dji vik’rai come in Sultan
Au Printenps,
Dj’arai toute èm’ liberté
Dins l’Esté,
Dji n’ dèpendrai pus d’ persone
Dins l’Automne,
Dji n’arai pus d’ quénte au r’viêr
Dins l’Hiviêr,
Dji s’rai l’ pus gai des gârçons
Dins toutes les saisons.
Ci tchanson-ci sèrè éditéye divant wêre avou l’ musique, pa l’ maujone Dorey, « Aux 100,000 tchansons », passâdje dèl Bourse, à Châlerwè. On trouve d’alieûrs èmon Dorey totes les tchansons walones des mèyeûs auteûrs du bassin d’ Châlerwè. Les œûves do camarâde Loriaux, qui nos a promis s’ collaboracion à nosse Ban-Cloke, sont vindeuwes ossi pa l’ maujone des 100,000 tchansons. Dimandez ses dairins succès : Les djonnès fîyes dèl Walonîye, V’la l’ Solia, Djè su sauléye, Çu qu’on m’a fait, Stances à Riyète, Quand nos d’alunn’t au bos, Je n’ suis pas de la p’tite bîre, Philomène, M’ pètit pinson, A bas les tonbolas, El pû anbicieûs, etc…