Spôrts: les tchafiaedjes do Ptit Louwis (6)
Di timps-in timps, nos plons yesse fièrs di yesse çu qu' nos 'stons. Pouqwè ? dalèz m' dire. Wètèz in pô çu qu' nos espwêrs vègnnut di rèyussi è fotbale.
Si les djouweus eyet l'ètrin.neu d' l’èquipe prumière èn mèritnut nén qu'on dvize di yeusses télmint is ont stî mwés dins toutes leus pârtiyes, on ndè dira nén ostant des ptits djon.nes.
- A c'est seur. Ç' n' est nén télmint in problin.me di talant eyet d' capacités ou bén co min.me d'espéryince. Non fét ! I gn a surtout çu qu'i gn a dins leu tiesse. Ça, c'est m'-n avis. Yeusses rola, is djouwnut pou gâgnî.
C'est qui les ptits Beljes n'avît nén peu d' èdaler padvant. Is avît çu qu' nos pourîs lomer el sinse do sacrifice pou, quand gn aveut dandjî d' bouchî ls èreurs des ôtes, yesse la pou-z aratchî l' balon aus djouweus d' l' ôte èquipe. Eyet vla comint is ont rèyussi l'esplwèt d' ès qualifyî pou l' dèmiye finâle di l'Euro 2007. Mins ètou pou les Djeus Olimpiques di Pèkin.
Dins ç'-n èquipe la, i gn a des djon.nes avou des nos a rtènu pou pus taurd. Nos ârons seurmint l'ocâsion di dè dviser dins saquantès anéyes.
- Fwè da Ptit Louwis ! Dji pinse a Mirallas, Ciman, Haroun, Blondel, …, eyet tous ls ôtes.
Si rola è l' Holande, toutes les pârtiyes dè valît les pwênes, el dérène a Heereveen conte les Holandès èdmeurra dins les mémwères des amateurs di fotbale. Rola, les Espwêrs ont stî rèyussi in deus a deus qui les assureut d'aratchî leu tiquet pou Pèkin. Les omes da de Sart ont dvu mète el pressiyon eyet djouwer pus hôt pou n' nén yesse èfoncîs pa ls Orandjes. El fuzéye èvoyîe pa Sébastien Pocognoli, bén lancè pa Blondel, mèriteut a lèye toute seule ès pezant d'ôr. Èç djouweu la a dayeur sitî lomè " l'ome del pârtiye ". Pou chûre, i gn aveut pus qu'a t'nu in quârt d'eure. Çu qu'is ont fét.
El dèmiye finâle conte el Sèrbiye n'aveut pus wêre d'impôrtance. El principâl esteut dins l' satch : èdaler a in tournwè olimpique, çu qui n'aveut pus arivè aus djouweus di no payis dispu … 80 ans. Les espwêrs âront insi l'ocâsion d'èdaler rtrouver Huanhuan, el mascote des Djeus di Pèkin è 2008.
El rèyussite è l' Holande, ç' n' est nén seulmint l' cène d'ène èquipe, mins ètou i n' faureut nén roubliyî leu-n ètrin.neu, Djan-Françwès de Sart.
On dit toudi qu'èç mestî la n'est nén aujiy. C'est l' vré. On l'a vèyu avou Djacky Matthyssen a Châlèrwè èt dispu don, passè dins l' Vènîze do Nôrd, a Bruges. Quand l'èquipe gâgne, tertous est binauje. Mins quand èle cominche a piède des plomes, on est râde su l' dos d' l’ètrin.neu. Adon, i n' faut nén fé l' fine bouche quand nos avons ène èquipe nationâle qui pète des flames.
Du costè d' Pèkin, ça sra ène ôte istwêre. Mins les céns qui, come mi, ont wétî dins l' bwèsse as imâdjes les pârtiyes des espwêrs è l' Holande ni l'ergrètnut nén. Eyet rèyussi ene gadjûre téle qui çtèle-la (come direut Djan-Luc Fonck), adon qu' l’èquipe preumiyère n'est nule paut, c'est d'dja quazimint èn esplwèt.
Jean Goffart, li 1î d' awousse 2007.