Mes camèrâd’ m’ont v’nou dir’ : c’est noss’ fièsse
Vinez danser ;
Qu’in aut’ s’amus’, mi ji pleur’ li maîtresse
Qui m’a qwitté.
Ji l’aimév’ tant, elle aveut mes pinsêies
Di nute et d’joû ;
Leyîz-m’ plorer, tot’ mi veie est gâtêie,
Ji l’a pierdou.
Ses p’titès mains avît l’ même blankiheur
Qui nos feus d’lys
Et ses deux lèp’ estît pus ros’ qui l’ fleur
Di nos rosîs.
Mâie nol fâbit’ n’a fait oyî comm’ leie
Des chants si doux.
Leyîz-m’ plorer, tot’ mi veie est gâtêie,
Ji l’a pierdou.
Vos âriz dit quéque ang’ vinou so l’ térre
Divint l’ moumint
Qu’ell’ pârtihév’ tot’ ses spâgn’ à l’ misére
Des ôrphilins ;
Ou qu’elle aidiv’ si veie mére à l’ vesprêie
Po r’monter l’ soû.
Leyîz-m’ plorer, tot’ mi veie est gâtêie,
Ji l’a pierdou.
Ji n’ pous roûvî qu’è l’ saison des violettes
Ell’ mi deri :
Louk’ ces ouhais apîstés so l’ cohette
Si fiestèt-i !
« Va, qwand on s’aim’, tos les joûs d’ine annéie
Sont des bais joûs. »
Leyîz-m’ plorer, tot’ mi veie est gâtêie,
Ji l’a pierdou.
Elle est à c’ste heur’ co pus haut qui les s’teules
È paradis ;
Poquoi fât-i quell’ seûie èvôie tot’ seule
Èvôie sin mi ?
On a bai m’ dire i fât bin qu’ t’el rouveie,
Est-c’ qui j’el pous ?
Leyîz-m’ plorer, tot’ mi veie est gâtêie,
Ji l’a pierdou.