Dimeigne j’aveus côpé
On bouquet d’ fleurs è pré,
J’aveus n’masse di clawsons ainsi qu’des mâgriettes,
Quand dj’ètinda drî mi mi p’tite cusène Nanète
Mi dire tot bahant l’front, i fât-esse binamé.
Adon tot bas
J’oya Nanète qui d’ha :
Ah ! mi p’tit Colas, pusqui ji v’s ainme,
Dinnez-m’ vosse bouquet
Po gârni m’ côrset.
Ah ! vos paurez l’attètchî vos-minme.
Mi, ji l’âreut bin mètou,
Mins ji n’a nin wèzou !
Nanette prinda m’ bouquet
Qui gârniha s’ corset.
Adon po nos r’pwèser nos nos mètîs drî l’hâye
Assiou so l’vért wazon, ji nè l’ rouvèyrè mâye,
On s’ bâhîve tot côp bon, hureux comme des p’tits rwès.
Adon tot bas
J’oya Nanète qui d’ha :
Ah ! mi p’tit Colas, tél’mint qui j’ v’s ainme,
Ji sins mi p’tit cour
Qui toctéye d’amour.
Ah ! si vos volez, sintez-le vos-minme.
Mi, dji l’y âreus sintou.
Mins ji n’a nin wèzou !
Mins Nanette si mâv’la,
Et jètant s’ bouquet là, qui m’kihagne,
Vla qu’èle si mète à braire : ji sins m’ bresse
Ji creus ou’c’est ine frumihe so les jambes qui m’ kihagne
Adon, rilèvant s’ cotte, elle mi dèrit tot bas :
C’est chal pus haut
Et çoula m’ ginne baicôp.
Ah ! mi p’tit Colas, pusqui ji v’s ainme,
Dinnez-me on côp d’ main,
Çoula m’frè dè bin.
Ah ! ji v’s è supplèye, qwèréze vos minme.
Mi, j’âreus bin volou,
Mins ji n’a nin wèzou.
Vos estez pawoureux
Colas, c’est malhèreux,
Dèrit mi p’tite cusène tot m’ prindant d’vins ses bresses
Mi j’ qwèréve so ses tchâsses pinsant dè trover l’ biesse,
Mins pou louquî pus haut j’esteus bin trop honteux
Adon, tot bas,
J’oya Nanètte pui d’ha :
Ah ! mi p’tit Colas, pusqui ji v’s ainme,
Qwèrez tos costés,
Sûr qui vos trouv’rez
Ah ! ji v’s è prèye, fé comme po vos minme.
Mi ji vèyéve tot bablou,
Et ji n’a nin wèzou !