Il esteut do costé des astéroyides 325, 326, 327, 328, 329 eyet 330. Ça fwait ki, po-z ataker, i ls a stî viziter po trover ene sacwè a fé eyet po-z aprinde.
On rwè dmoréve sol prumî. Li rwè, moussî di pourpe eyet d' ermene, esteut ashiou so on trône tot simpe eyet portant foirt madjestiveus.
- Â! Vola on sudjet, criya-t i li rwè cwand il aviza li ptit prince.
Et li ptit prince si dmanda:
«Kimint çk' i m' kinoxhe bén, pusk' i n' m' a co måy veyou?»
I n' saveut nén k' les rwès fjhèt voltî l' monde pus simpe k' i n' est: totes les djins sont des sudjets.
- Vinoz pus près, ki dji vs veye mî, derit i li rwè, tot fir d' esse li rwè d' ene sakî, po fini.
Li ptit prince tapa on côp d' ouy po cachi après on xhame po s' ashir, mins l' bole esteut ehalêye tote etire på clapant mantea d' ermene. Ça fwait k' il a dmoré d' astampé. Come il esteut nåjhi, i båya.
- Les lwès do palå volèt k' on n' båye nén pa dvant li rwè. Dji vos l' disfind.
- Dji n' mi sé espaitchî, responda-t i li ptit prince, djinné. Dj' a fwait ene fameuse trote, eyet dji n' a nén doirmou!
- D' abôrd, dji vos cmande di båyî. Dji n' a veyou nouk ki båyive des anêyes å lon. Les båymints, por mi, c' est åk di curieus. Alez, båyîz co. Dji vos l' ôrdone.
- Dji so disfranki, asteure! Dji n' såreu pus! fijha-t i li ptit prince e rodjixhant.
- Hem! hem! responda-t i li rwè. D' abôrd! dji vos cmande di båyî pa des côps, eyet pa des ôtes côps, di!
I tchictéve on pô, et il aveut l' air k' il esteut choké.
Ca li rwè, çou k' i voleut å dzeu d' tot, c' esteut k' on schoûtaxhe çou k' i djheut. I n' saveut sopoirter k' on rnictêye cwand i cmandéve ene sacwè. C' esteut on monarke absolou. Mins come il esteut foirt bon, i cmandéve des afwaires a môde di djin. «Si dji cmandreu, end aléve-t i mwints côps, si dji cmandreu a on djenerå do s' candjî a moxhon d' mér, eyet si l' djenerå ni schoûtreut nén, ça n' sereut nén l' djenerå les fåtes. Ça sereut mi l' fåte.»
- Est çki dji m' pou bén ashir? dimanda-t i li ptit prince timidmint.
- Dji vs kimande di vs ashir, responda-t i li rwè, tot raminant, madjestiveus, on panea di s' mantea d' ermene.
Mins li ptit prince esteut sbaré. Li planete esteut tote tchote. Di cwè esteut i rwè, ci rwè la?
- Sire!, dijha-t i, dji vos dmande escuze di vos dmander ene sacwè!
- Dji vs kimande di m' dimander ene sacwè, si dispaitcha-t i li rwè.
- Sire! Di cwè estoz li rwè?
- Di totafwait, responda-t i li rwè tot simplumint.
- Di totafwait?
Li rwè, sins fé do grandiveus, mostra s' planete å doet, pu les ôtès planetes eyet les stoeles.
- Di tot ça? derit i li ptit prince.
- Di tot ça! responda-t i li rwè.
Ca i n' esteut nén seulmint monarke absolou, mins ossu monarke univiersél.
- Eyet les stoeles vos schoûtèt?
- Oyi, ça, derit i li rwè. Ele schoûtèt sol côp, paret! Dji n' sopoite nén k' on rnictêye.
Ene poûxhance insi, li ptit prince end esteut tot merviyî. Il åreut yeu tot ça da lu, ci n' est nén cwarante cwate côps, mins septante deus, ou cint, ou minme deus cints côps k' il åreut savou rloukî l' solea s' coûtchî sol minme djournêye, sins måy divu bodjî s' tcheyire! Et come i s' sinteut ene miete poenneus del sovnance di si ptite bole abandnêye, i s' ehardixha eyet dmander ene gråce å rwè:
- Dji vôreu bén vey li solea s' leyî aler djus! Fijhoz m' plaijhi! Kimandez å solea di s' leyî aler djus!
- Si dji cmandreu a on djenerå do cavoler d' ene fleur a l' ôte, a môde di palvole, ou bén di scrire ene trådjudeye, ou di s' candjî a moxhon d' mér, eyet si li djenerå ni fjheut nén çou ki dji li a cmandé, kî åreut toirt? Lu ou mi?
- Ci sereut vos, derit i li ptit prince sins balziner.
- Tot djustumint. I fåt dmander a tchaeke onk çou k' i såreut bén ofri. Nole ôtorité sins råjhon. Si vos cmandez a vosse peupe di s' aler taper el mér, i s' solevrè. Dj' a l' droet do cmander k' on m' schoûte paski dji n' kimande rén ki n' soeye raizonåbe.
- Et m' solea djus, d' abôrd? repeta-t i li ptit prince, ki n' rovyive måy ene sacwè k' il aveut dmandé.
- Vosse solea djus, vos l' åroz. Djel kimandrè. Mins, come dji cnoxhe bén li syince di govierner, dji ratindrè l' meyeu moumint.
- Cwand çk' i vénrè, ci moumint la? dmanda-t i li ptit prince.
- Hem! hem! responda-t i li rwè, ki rwaita po cmincî dins on gros årmonak, hem! hem! ci serè, aviè! aviè! ci serè ouy al nute aviè vint munutes divant ût eures! Et vos vieroz come on m' schoûte bén.
Li ptit prince båya. Ça lyi aléve lon do n' pont avu d' solea djus. Et pu, i cmincive dedja a s' anoyî on pô:
- Dji n' a pus rén a fé chal. Dji m' va nd aler!
- N' end alez nén, derit i li rwè, k' esteut si fir d' avu on sudjet. N' end alez nén, dji vs lome minisse!
- Minisse di cwè?
- Di! del djustice!
- Mins gn a nouk a djudjî!
- On n' e sét rén, derit i li rwè. Dji n' a nén co fwait tot l' tour di mi rweyôme. Dji so foirt vî eyet dji n' a nén del plaece assez po ene vweteure. Et dji so rade nåjhi å roter.
- Ô! mins dj' a ddja veyou, derit i li ptit prince tot s' clintchant po co taper ene ouyåde di d' l' ôte costé del bole. I gn a nouk drola nerén!
- E bén vos vs djudjroz vos minme, li responda-t i li rwè. C' est çou k' i gn a di pus målåjhey. On-z a bråmint pus målåjhey do s' djudjî lu minme ki do djudjî ls ôtes. Si vos parvinoz a vs djudjî comifåt vos minme, vos seroz on sadje po do bon.
- Mi, dji m' såreu djudjî mi minme tot costé. Dji n' a nén dandjî do dmani vaici po ça.
- Hem! hem! derit i li rwè. Dj' a les pinses ki so m' planete, i gn a on vî rat, ene sawice. Dji l' etind del nute. Vos pôroz djudjî ç' vî rat la. Di tenawete, vos l' condannroz a moirt. Insi, si veye ni ténrè k' a vosse djustice. Mins vos rmetroz s' poenne a tchaeke côp pol sipårgni. I gn a k' onk.
- Mi, dji n' inme nén do condanner a moirt, eyet dji pinse bén ki dj' eva.
- Neni, derit i li rwè.
Mins on côp k' i fourit presse, li ptit prince ni vola nén fé del poenne å vî monarke.
- Si vosse madjesté vout k' on l' schoûte pontieuzmint, ele mi duvreut cmander ene sacwè di raizonåbe. Ele mi pôreut cmander, boutans, d' end aler dins ene munute. Dj' a l' idêye ki c' est l' bon moumint!
Come li rwè n' respondeut nén, li ptit prince balzina. Adon, tot sospirant, i leva l' daxhe.
- Dji vs fwai mi ambassadeur, derit i radmint li rwè.
Il aveut l' air d' ene sakî ki s' sét fé schoûter.
«Les grandès djins sont droles, vormint», si djheut i li ptit prince dins ouve, tins di s' voyaedje.
Hårdêye difoûtrinne