(prononçaedje eterpayis
mins, pacô, gn a on mot di rcandjî)
Li cwatrinme planete, c' esteut l' cene do businessman. Il aveut télmint del bezogne, èm-n ome, k' i n' a nén ddja levé s' tiesse cwand li ptit prince ariva.
- Bondjoû, derit i ci chal. Vosse cigarete est distindowe.
- Troes et deus, cénk. Cénk et set, doze. Doze et troes, cwénze. Bondjoû. Cwénze et set, vint deus. Vint deus et shijh, vint ût. Nén l' tins del raloumer. Vint shijh et cénk, trinte onk. Ouf! Ça fwait cénk cints on miyon shijh cints vint deus meye set cints trinte onk.
- Cénk cints miyons di cwè?
- Di cwè? Vos estoz co la? Cénk cints on miyon di! dji n' sé pus! Dj' a télmint di l' ovraedje! Dji so sérieus, la, mi. Dji n' piede nén m' tins po des tchitcheyes! Deus et cénk, set!
- Cénk cints on miyon di cwè? repeta-t i li ptit prince ki, di tote si veye, n' aveut måy rovyî ene kesse, on côp k' i l' aveut dmandé.
Li businessman rileva s' tiesse:
- Dispoy céncwante cwatre ans ki dji dmeure so cisse planete ci, dji n' a stî disrindjî ki troes feyes. Li prumire feye, c' esteut vola vint deus ans, d' ene baloujhe toumêye li bon Diu sét di d' wice. Ele fijheut on traeyin d' tos les cints diâles et dji m' a brouyî cwate côps dins ene acdicion. Li deujhinme feye, c' esteut vola onze ans, po ene crijhe di rumatisse. Dji n' bodje nén assez. Dji n' a nén l' tins do baloujhner. Dji so sérieus, mi. Li troejhinme feye! vo l' ci! Bon, dj' end esteu a cénk cints on miyon!
- Miyons di cwè?
Li businessman compurda k' i n' sereut nén leyî e påye.
- Miyons des ptits cayets, la, les ptitès sacwès k' on voet sol cir, des côps k' i gn a.
- Des moxhes?
- Neni, les ptits cayets ki rglatixhèt.
- Des moxhes al låme?
- Neni, les ptitès dorêyès sacwès ki fjhèt sondjiner les nawes. Mins dji so sérieus, mi! Dji n' a nén l' tins do sondjiner.
- Â! des stoeles!
- Oyi, c' est çoula: des stoeles.
- Et cwè fjhoz avou cénk cints miyons di stoeles?
- Cénk cints on miyon shijh cints vint deus meye set cint trinte onk. Dji so sérieus, mi, eyet spepieus.
- Et cwè fjhoz avou les stoeles?
- Çou ki dj' è fwai?
- Oyi.
- Rén. Djels a da minne.
- Vos avoz les stoeles da vosse?
- Oyi.
- Mins dj' a ddja veyou on rwè ki!
- Les rwès n' ont rén da zels. I «ringnèt» so. Ça n' est nén l' minme afwaire.
- A cwè çoula vos sieve-t i d' avu les stoeles da vosse?
- Ça m' sieve a-z esse ritche.
- Et kéne avance d' esse ritche?
- Dji sé atchter des ôtès stoeles, s' i gn a ene sakî k' è trove.
«Vo ndè la onk, derit i li ptit prince dins ouve, ki tuze on pô come mi sôleye.»
Mågré tot, i dmanda co des ôtès afwaires.
- Kimint pout on avu des stoeles da lu?
- Da kî çk' ele sont? riclapa-t i li businessman, tot grigneus.
- Dji n' è sé rén. Da nolu.
- D' abôrd c' est da mi, ca dj' î a pinsé l' prumî.
- C' est tot çou k' i fåt?
- Oyi, ça. Cwand vos trovez on diyamant ki n' est da nolu, c' est da vosse. Cwand vos trovez èn ilea ki n' est da nolu, c' est da vosse eto. Cwand vos estoz l' prumî a-z avu ene idêye, vos fjhoz mete on droet dssu: c' est da vosse. Et mi, dj' a les stoeles da minne, puski nouk divant mi n' a sondjî a ls avu da lu.
- Ça c' est l' vraiy, derit i li ptit prince. Et ki fjhoz, avou vos stoeles?
- Dji les manaedje. Dji les conte et les rconter. Dj' a målåjhey. Mins dji so-st èn ome sérieus.
Li ptit prince n' è saveut nén co assez.
- Mi, si dj' a on noret da mi, djel pou bén bouter åtoû di m' cô et l' epoirter. Si dj' a ene fleur da mi, djel pou bén code et l' epoirter. Mins vos n' sårîz code des stoeles!
- Nonna, mins djelzès pou mete al banke.
- Cwè çki ça vout dire, di ça?
- Ça vout dire ki dji scrî so on ptit boket d' papî li nombe di mes stoeles. Adon, dji here ci papî la dins on ridant seré al clé.
- Et c' est tot?
- C' est assez!
«La téns ene sacwè d' comike, pinsa-t i li ptit prince. On direut del powezeye. Mins ça n' est nén foirt sérieus.»
Tant k' ås sérieusès afwaires, li ptit prince aveut pår des ôtès idêyes ki les grandès djins.
- Mi, derit i, dj' a ene fleur da mi, et djel raiwe tos les djoûs. Dj' a troes volcans da mi, et dji les schove totes les samwinnes. Ca dji schove li ci k' est moirt avou. Sét on måy. Ça ahesse bén mes volcans, eyet ça ahesse bén m' fleur, ki djels a da mi. Mins vos, vos n' siervoz a rén po vos stoeles.
Li businessman drova s' boke, mins i n' trova rén a responde, et li ptit prince end ala.
«Les grandès djins, ça est vraimint foû ewaerant», si djheut i dins lu minme, tins di s' voyaedje.