(prononçaedje eterpayis
mins, pacô, gn a on mot di rcandjî)
Et l' setinme planete, paret, c' esteut l' Tere.
Li Tere n' est nén ene sakêye bole come totes les ôtes! I gn a drola cint et onze rwès (sins rovyî, come di djusse, les rwès négues), set meye djeyografes, noûf cints meyes businessmen, set miyons et dmey di sôleyes, troes cints onze miyons di grandiveus, çou ki fwait a pô près deus miyårds di grandès djins.
Por vos avu ene idêye del grandeu del Tere, dji vs dirè ki, divant k' on-z edvintaxhe li corant, i faleut etertini, so les shijh continints, ene årmêye di cwate cints swessante deus meye cénk cints onze esprindeus d' lampes.
Veyou di d' lon, c' esteut foû bea, vormint. Les movmints di ciste årmêye estént adjinçnés come les cis d' on balet a l' operå. Po cmincî, c' esteut l' tour des esprindeus d' lampes del Nouve Zélande eyet di l' Ôstråleye. On côp leus kénkets aloumés, ces ci alént coûtchî. Adon, c' esteut l' tour dåzès esprindeus d' lampes del Sibéreye eyet del Chine, k' intrént dins l' cråmignon. Adon, zels eto, i s' rimuchént dins les coulisses. Pu, c' esteut l' tour des esprindeus d' lampes del Russeye eyet des Indes. Adon, les cis del Afrike eyet di l' Europe. Et i gn a måy onk ki s' brouyive po si intrêye sol sinne. C' esteut grandissime.
I gn a ki l' esprindeu del seule lampe do pôle Nôrd, eyet s' copleu del seule lampe do pôle Sud, ki viként come des nawes et des edoirmous: il ovrént deus feyes l' an.