I gn aveut asteure ût djoûs ki dj’ esteu an rak e dzert, et dj’ aveu choûté l’ istwâre do martchand tot bevant l’ dierinne gote d’ aiwe ki dj’ aveu por mi.
- A, dijha dju å Ptit Prince, c’ est des djoleyès sovnances ki vos m’ contez la, mins mi-y avion n’ est nén co remantchî, dji n’ a pus rén a boere et dji sereu binåjhe, mi-y avou, si dji pôreu roter tot doûçmint disk’ adlé ene fontinne !
- Mi camaeråde l’ ernåd…
- Mins mi ptit boket, i n’ s’ adjit pus do rnåd !
- Douvént ?
- Paski ns alans mori d’ soe.
I n’ compurda nén mes råjhons, ca i responda :
- C’ est bén d’ awè yeu on cama, minme s’ on va mori. Mi, dji so fén binåjhe d’ awè yeu l’ ernåd come soçon.
«I n’ comprind nén ki nos estans e dandjî, mi deri dj’ e mi-minme. I n’ a måy ni fwin ni soe. Avou ene rayêye di solea, i fwait bén.»
Mins i m’ erlouca et, come ene response a m’ pinsêye :
- Dj’ a soe eto. Cachans après on pousse !
Dj’ a fwait ene djesse come onk k’ est nåjhi : ça n’ a nou sinse d’ aler cweri après on pousse a l’ astcheyance dins ene foû grande wastene. Et mågré ça, nos ns avans metou a roter.
Après awè roté des eures å lon, sins moti, li nute touma, et les stoeles s’ esprindît. Dj’ els avizéve come dins on sondje, ca dj’ aveu ene miete del five, cåze del soe. Les mots do Ptit Prince dansént dins m’ memwere.
- Ça fwait k’ vos avoz soe eto ? dimanda dj’.
Mins i n’ responda nén a m’ kesse. I derit simplumint :
- L’ aiwe pout-z esse boune pol cour avou.
Dji n’ compurda nén s’ response mins dji m’ taijha. Dji saveu bén k’ i n’ lyi faleut nén dmander les ca et les ma.
Il esteut hode. I s’ ashida. Dji m’ meta dlé lu. Et, après on boket sins rén dire :
- Les stoeles sont beles, derit i, plamour d’ ene fleur k’ on n’ voet nén.
Dji responda «Oyi, bén seur». Et dji rwaita sins moti les pleus do såvlon padzo l’ lune.
- Li dzert est bea, dijha-t i.
Et c’ esteut l’ vraiy. Dj’ a tofer veyou voltî les wastenes. On s’ ashît so on tiene di såvlon. On n’ voet rén. On n’ ôt rén. Et portant, gn a ene sacwè ki rglatit sins brut.
- Çou ki fwait ki l’ wastene est co pus bele, derit i li Ptit Prince, c’ est k’ ele catche on pousse ene sadju.
Tot d’ on côp, dji fouri sbaré d’ awè comprins li drole di rglatixhmint do såvlon. Estant on ptit valet, dji dmoréve dins ene viye måjhon. Sapinse ene ancyinne fåve, gn aveut-st on trezôr k’ î esteut muchî. Come di djusse, gn a måy nouk ki l’ aveut discovrou et gn a motoit måy nouk k’ aveut cachî après. Mins il estchantéve tote cisse måjhon la. Mi måjhon catchive on scret å fond di s’ cour.
- Oyi, deri dju å Ptit Prince, ki ça soeye li måjhon, les estoeles oû bén li dzert, çou ki fwait leu beaté, on nel såreut vey avou ses ouys.
- Dji so binåjhe, derit i, ki vos soeyoxhe dacoird avou m’-n ernåd.
Come li Ptit Prince s’ edoirmeut, dj’ el purda dins mes bresses et m’ ermete e-n alaedje. Dj’ esteu tot rmouwé. Dj’ aveu l’ idêye ki dji poirtéve on cazuwel trezôr. Dj’ aveu minme l’ idêye k’ i gn aveut rén di pus cazuwel so tote li Bole. Dji loukive, al loumire del beaté, li front bladjot, les ouys serés, les croles ki tronnént e vint, et dji m’ dijheu : «Çou k’ dji voe la n’ est k’ ene eschoice. Li pus consecant ni s’ voet nén».
Come ses lepes adrovowes sayént on dmey sorire, dji m’ deri co : «Çou ki m’ ermowe si foirt dins ci Ptit Prince la, ki doime, c’ est k’ il est si fidele a ene fleur. C’ est l’ imådje d’ ene fleur ki rglatit dins lu come li blame d’ ene lampe, minme cand c’ est k’ i doime.» Et dj’ advinéve k’ il esteut co pus cazuwel ki çoula. Les lampes, i les fåt bén mete a houte : on côp d’ vint et vo lzès la distindowes.
Et, tot rotant insi, al pikete do djoû, dji discovra l’ pousse.
Hårdêye difoûtrinne