Asteure, bén seur, vola ddja shijh ans. Dji n’ aveu co måy raconté ciste istwere ci. Cwand i m’ ont rtrové, mes camaerådes ont stî foû binåjhes di m’ rivey evike. Dj’ esteu disbeli, mins dj’ endaléve : « C’ est paski dji so scran ».
Asteure, dji so-st on pô rapåjhté. Bon, nén totafwaitmint, po dire li vraiy. Mins dji sai bén k’ il est rivnou so s’ bole ca, al pikete do djoû, dji n’ a nén rtrové s’ coir. Ci n’ esteut nin on si pezant coir ki ça. Et, del nute, dji choûte voltî les stoeles. C’ est come cénk cints miyons d’ xhiletes.
Mins vola k’ i s’ passe ene sacwè d’ estrawordinaire. Li muzlire ki dj’ aveu dessiné po li Ptit Prince, ebén, dj’ a rovyî d’ î mete ene coroye di cur ! I nel sårè måy ateler å bedot. Ça fwait k’ dji m’ dimande : « K’ i gn a-t i d’ arivé so s’ bole ? Motoit bén ki l’ bedot a mindjî l’ fleur, po fini. »
Des feyes k’ i gn a, dji m’ di : « Surmint k’ neni ! Li Ptit Prince mete si fleur a houte tos les djoûs a l’ anuti padzo s’ bole di veule, et s’ tént i l’ bedot a gogne. » Adon, dji so binåjhe. Et totes les stoeles riyèt doûçmint.
Mins des feyes k’ i gn a, dji m’ di : «On côp ou l’ ôte, on n’ sondje nén a tot, et raf ! on djoû al brune, il årè rovyî l’ bole di veule ; oudonbén, li bedot a vnou sins brut, k’ i fjheut spès. » Adon, les xhiletes tournèt tertotes a låmes !
C’ est on foû grand mistere, tot çoula. Por vos ki voet voltî li Ptit Prince eto, come por mi, rén dvins l’ univiers n’ est l’ minme si, ene sadju, on n’ sait wice, on bedot k’ nos n’ kinoxhans nén a mindjî ene rôze, oyi ou neni.
Loukîz li stoeloe. Dimandez vos : « li bedot a-t i mindjî l’ fleur, oyi ou neni ? » Et vos vieroz come totafwait candje. Et gn a måy nole grande djin ki compudrè k’ çoula est si consecant !
Hårdêye difoûtrinne