Li bijhe et l’ solê estint e margaye. Et tchik et tchak, et tchik et tchak : one paskeye ki n’ éve pont d’ fin, dji vos di. Paski chakin d’ zels dijéve k’ il astéve li pus foirt.
Mins on bê djoû, vola k’ i rescontrèt on voyadjeû k’ arivéve pal trin d’ Mårloye et k’ a dischindu al gåre di Jmèle. Mondiu todi ! Kén apoticaire ! K’ il éve må l’ air avou ses tchvès emacralès ! Il estéve droldimint agayolè, tot ravôtiè dins on vî paltot trawè pa les mites. On vrai bribeû !
« Mètans nos d’ acoird ! » dit-st i onk des deus lascår. « Li prèmî k’ arive a foirci l’ ome si Mårloye a rsatchè s’ paltot, serè rwaitè come on vrai castår.
Adon, a ! kéne arèdje, mes djins ! Li bijhe a cmincè a chuflè di totes ses foices, et a stårè tos les cantias d’ Celina.
« Maria deyî ! Kéne atelêye vaici ! »
Mins dipus k’ ele chufléve, dipus ki nost ome tronnéve et s’ racrapotéve dins s’ cazake. Al fin des fins, li bijhe, tote disbåtchée, a leyî tumer les brès. « A ! c’ est pol diåle, dit-st ele. Dji n’ ai nin plu lî fé rôster s’ paltot, nodidjo ! »
Nosse solê ni fiéve pont d’ bin. Mins i n’ estéve nin biesse, et il end a profitè po cmincè a lûre, a lûre télmint k’ il a mètu ses nwârès berikes po n’ nin yesse li-minme asbleuwi.
One miète pus tård, l’ ome di Mårloye k’ éve ossi tchôd k’ dins on for, a fini pa s’ dismoussè.
Ça fait insi ki l’ bijhe, elle a stî foircée d’ ricnoxhe, ki l’ solê éve gangnè, et ki ç’ grandiveûs la estéve vraimint l’ pus foirt.
L’ eredjistrumint a stî l’ ouve da Lucyin Mahin k’ end a tos les abondroets.
Il est oyåve vaici.