LI BOUQUET DÈL MARIÉYE
ou « Li bia bouquet »
C’a stî one saqwè d’ drole,
L’ôte fîye dj’aveûve one crole,
Tot-aspouyî
Dj’alais sokî,
L’amour vint m’ rèwèyî.
Refrain
C’est d’mwin li djoû di m’ mariadje,
Aprètez, aprètez tos vos bouquets,
Vos les mètroz au cwarsadje
Des bauchèles do banquet.
Mais c’est l’ mène li pus djolîye !
Ossi vraimint dji m’ rafîye
Di lî doner li bouquet,
Ele aurè li bia bouquet !
C’esteûve mi p’tite Marîye
Come èle esteûve djolîye !
Quél ambaras
Ca stî’ ç djoû-la
Qui dj’a signé l’ contrat !
Adiè totes mes folîyes,
Dj’intère dins l’ confrérîye,
C’est-a l’auté
Qui dj’ va djurer
Amour, fidélité.
C’est d’mwin qu’ dji m’boute a piesse
Adiè tote li djonnesse,
Po comincî
Dji m’ va satchî
A l’ cwade a tot spiyî.
Nicolas Bosret.