Les fåves do vî vî tins la ki l’ Diåle divént on maçon, aidî d’ ene nûte di diålotins, end a d’ deus sôres. Dins l’ cene do Molén des Cawetes, li Diåle apice l’ åme do mônî.
Di ç’ tins la, i gn aveut, al Veye-do-Bwès-so-Såm, on drole di ptit molén basti pa èn etrindjir arivé d’ on n’ sait wice. Ci mônî la esteut foirt coraedjeu. Ossu decida-t i di taeyî lu-minme les deus pires di molén k’ i lyi faleut por lu s’ agrandi. Li prumire pire di grès d’ arkôze, trovou so plaece, fout radmint presse et reyusseye d’ afaçon.
Mins nerén, l’ ome ni parvina måy a tourner l’ deujhinme !
« Ki l’ Diåle s’ endè mele » breya-t i tot hinant ses usteyes e bî djondant.
« D’ acoird ! » lyi responda Satan tot-z abrokant foû d’ ene craeyeure del rotche d’ a costé.
Li mônî fourit foirt sibaré mins çoula ni dura ki pô d’ tins. Nost ome et l’ Malén front l’ afwaire di s’ ritrover l’ ôte après-dwmin, a meynute.
A l’ eure ficsêye po l’ radjoû, on martchî fourit decidé et siné e letes di sonk : å mônî, on clapant molén et les çanses k’ i fåt po l’ fé frudjî el plinne djouwixhance po vint-cénk anêyes ; a Satan, après on cwårt di sieke, l’ åme do mônî !
Li mônî rintra e s’ måjhon et s’ edoirma come on paket.
Al pikete do djoû d’ après, ki veya-t i ? On molén sins parey avou totes les ahesses. A ! A ! ké bea molén… !
Houte des vint-cénk ans, li molén fourit florixhant. Tos les vîs moléns do payis pierdént leus pratikes et cloyént onk après l’ ôte. Mins Satan n’ aveut rén rovyî. Il lyi faleut s’ proye !
A l’ eure minme del fén des vint-cénk anêyes, ene måle walêye esclata. On côp d’ aloumire tchôca l’ feu å molén et tot si ståra ezès blames.
Å mitan des trigus et d’ on hopea d’ cindes, on rpaira, avou ewaeråcion, li seule prumire pire di molén ki l’ mônî aveut adjusté divant d’ vinde si åme å Diåle.