Djeus e walon
Dins onk des prumîs « Coutcouloudjoû » (ene gazete e walon di l’ Årdene nonnrece, k’ a rexhou di 1996 a 2009), Clotile Benoit, skepeye a Viyance e 1921, nos aveut prezinté on djeu foirt simpe k’ i djouwént cwand elle esteut djonne.
I s’ adjixheut di mete on pougn so l’ ôte, a troes cwate djouweus. Tot montant l’ astaplaedje, a tchaeke côp, on djheut « monte Tchalete », pu « monte todi ». Li mwaisse djouweu ni mete nén s’ deujhinme mwin sol hopea.
… sont onk so l’ ôte, ci-ci va monter d’ on pougn so l’ ôte avou s’ libe mwin, tot djhant :
- Wice k’ est i, l’ boure k’ esteut la ?
On respond : - C’ est l’ tchet ki l’ a prins.
- Ou çk’ il est, l’ tchet ?
- Il est padzo l’ lét.
- Dou çk’ il est, l’ lét ?
- C’ est l’ feu ki l’ a broûlé.
- Eyou est i, l’ feu ?
- C’ est l’ aiwe ki l’ a distindou.
- Ewou est ele, l’ aiwe ?
- C’ est Mouhå ki l’ a boevou.
- Wice est i, Mouhå ?
- Il est evoye å bwès cweri des baguetes di côrî po bate si feme.
Et adon, l’ astaplaedje si dismantche, et on fwait les cwanses di s’ bate a côps d’ pougn.
Ké saizene, mes djins, li djoû k’ dj’ a trové des Afrikins ki djouwént cåzu å minme djeu ! Vola les paroles ki dj’ a rcopyî d’ ene comere ki shonnéve endè saveur li fén mot.
- Cwè çki c’ est d’ ça ?
- Li capucete da Hayda.
- Et çouci ?
- Li capuce do Zultan.
- Cwè çki gn a ddins ?
- Ene grinne di gurnåde.
- Wice est ele, mi pårt (del gurnåde) ?
- C’ est l’ tchet ki l’ a prins.
- Eyou est i, l’ tchet ?
- I s’ a muchî padzo l’ carpete.
- Ewou est ele, li carpete ?
- C’ est l’ feu ki l’ a broûlé.
- Edou est i, l’ feu ?
- C’ est l’ aiwe ki l’ a distindou.
- Wice est ele, l’ aiwe ?
- C’ est l’ gayet (li torea) ki l’ a boevou.
- W’ est i, l’ gayet ?
- Il est evoye al floye Ben Ayade. Chenn khrat aademm !
On n’ m’ a nén seu espliker l’ sinse des dierins mots mins il ont l’ air di fé rire les djins. Et l’ djeu finit come ça.
Des ôtes côps, dj’ a veyou ene des grandès djins ki djowe, catyî onk des efants ki djowéve avou zels, a môde des doetreces del Walonreye (« Li ci k’ a stî å bwès… li ci k’ a criyî tchîp tchîp al gueuye do leu », et on kekeye l’ efant.)
sicrît li 20 di fevrî. Li payis d' Afrike la ki l' djeu a stî rtrové, c' est l' Marok.