Di ç’ trevén la, les bordjoes d’ Hu djåzént co walon. Mins les djonnès Hutwesses avént ddja passé å francès.
Li djonne mame aspite li boneur.
Mågré k’ ele poite co l’ doû d’ ses parints – k’ ont dhoté onk après l’ ôte so shijh moes d’ tins –, elle est ureuse.
Elle aveut fwait tot si dvwer, leye, li pus djonne del famile. Aveut dmoré avou ses parints dismetant k’ ses frés et soûrs, zels, bastixhént leu veye bén lon. Ele lezî aveut sacrifyî s’ djonnesse ! Et portant, avnante come ele l’ esteut, l’ åreut ele volou k’ elle end åreut metou pus d’ onk a ses pîs.
Si riscompinse rawårdéve si eure. On djonne docteur end aveut toumé bleu sot. I s’ avént maryî et radmint ene pitite båshele aveut vnou å monde.
Les grandès djoyes souwèt les låmes et les djonnes parints naiviént-st e bouneur. Et, estant leus deus, après s’ aveur bén candôzé, fiesti, ey evolé eshonne a ndè piede li tiesse come totes les djonnès copes, i sondjént a leu vicåreye a vni, a l’ droete voye ki volént drovi dvant zels come des distrîxheus.
Ci djoû la, c’ esteut l’ grand djoû ! Li ci k’ ene djonne mame ni roveye måy ! Li ci ki si efant fwait ses prumîs pas ! Li ci ki l’ popa, ki lyi tént les mwins, li dislaxhe po l’ leyî cori adlé s’ mame, ki l’ rawåde ses bresses å lådje. Li ci ki l’ mame vôreut fé sepi a l’ tere etire : si ptite båshele a roté tote seule.
Ele ni tént pus. A schipe k’ arive l’ eure del pormoennåde, vo l’ la so l’ voye avou l’ efant gåyotêye a princesse. Vo l’ la so l’ « pormoennåde di l’ iye » ki tos les Hutwès kinoxhèt.
L’ iye a divnou on park avou ene bele alêye inte des rigletes di tiyoûs. Les vîs bordjoes l’ håbitèt et ont basti leus måjhones tot astok.
Tén ! djustumint, vola l’ vî Véncint k’ est a copiner so s’ soû avou ses camas. End a t-ele sondjî, li djonne cope, a l’ måjhone Véncint ! Cwand l’ vî ni serè pus la, ele serè-st a vinde et…
Mins, l’ djonne mame a bén ôte tchoi e l’ tiesse. Roslante et fîre, ele prind bén s’ tins po-z-ariver disk’ å cwåtron d’ vîs omes et d’ arinner l’ mwaisse del måjhone : « Ne seriez-vous pas fier, monsieur Vincent, d’avoir une si belle petite fille ? »
Et ci-cial responde : « k’ ènnè f’rû-dje, don, fèye ? Dji n’ a nole tète ! »
Tote djinnêye, li djonne mame dimora ståmusse.
Mwaisse modêye eplaideye dins l' live Dumont Gaspar, 2022.