Viyès tecnikes
Cwand l’ fenåmoes arivéve, on rbateut les fås avou l’ mårtea et l’ egloume et on rawijhive les lames di raezete.
Cwand on-z esteut gamén, on n’ inméve nén do tot pask’ i faleut tourner li pire di rawijhe al mwin, et c’ esteut deur. Avou l’ tins on-z a adapté ene rowe di velo ou on volant d’ machine a laver el plaece del manike. Avou ene corwè sol moteur del machine a laver, l’ afwaire a stî reglêye. Adon, on-z a veyou des tournantès pires ås pedales. Après, des ôtes rawijheuses otomatikes al setche pire. Mins l’ taeyant n’ esteut nén si bon.
Li raezete presse, li basse få sol dos et l’ pire et l’ coirnî rimpli d’ aiwe et d’ vinaigue al cinture do pantalon, on-z aléve fåtchî les intrêyes et les coines des bokets po fé del bele ovraedje. Cwand li raezete av’ fwait deus, troes bates, on rtournéve li prumire avou l’ rustea po pleur fåtchî l’ toû d’ åtoû.
Si l’ tins esteut å setch, i gn av’ wai d’ problinmes. Mins cwand l’ tins esteut al plouve et k’ i gn av’ des formoujhes [taupinière], li tere plakéve eter les dints. Et pu, on bôréve tos les dijh, cwinze metes !
On rivneut cobén å mitan d’ l’ après-nonne po rawijhî ene lame. Il arivéve k’ on casse li biele, on dint, des seccions ou des rivets.
Li raezete a on tchvå purdeut 1,07 m. di lådje, tandis k’ el cene a deus purdeut 1,37 m. On-z av’ troes sôres di båres so les raezetes : l’ ordinaire, l’ intermediaire et li Daenwesse. Li prumire av’ les dints foirt espacîs, li deuzime on pô pus serés mins simpes, dabôrd ki so l’ Daenwesse, les dints estént dobes et foirt serés. C’ est cisse-cile ki convneut l’ mî po les féns fours di pasteure.
On-z a vindou on pô des raezetes avou on moteur ogziliaire Bemard (A.E.B.I.) et des ôtes avou deus lames.
Po les beas fours di trimblene [trèfle], on meteut l’ tonea padrî l’ båre del raezete po fé des djougås (båsheles, marionetes) k’ on loyive unicmint al tiesse.
Cwand on-z av’ on bea four di cawes di rat [fléole], on-z e leyive vint-cénk, trinte åres po del simince. On les fåtchive al loyeuse a l’ awousse ; on fjheut des croupetes di troes djåbes k’ on loyive a troes rawetes po k’ les påtes ni s’ baténxhe nén a l’ air, ni al plouve.
Bråmint des cinsîs ont co fåtchî avou l’ raezete padrî l’ tracteur. Mins ça n’ aléve nén tot seu, et foirt vite les båres fåtcheuses lateråles et les ôtes poirtêyes so li rlevaedje ont-st arivé. Paski dins les målåjheys fours, on pleut fé tourner l’ lame pus vite et avancî pus douçmint.
Li revolucion dins les fåtcheuses, ç’ a stî bén seur les « rotatives » ås tabeurs ou ås assîtes. Cisse machine la, rén n’ l’ arestêye : ni formoujhes, ni pires, ni l’ flaxhî [blé versé], rén ! Cwand les prumires ont travayî, les djins racontént ki les waeyéns [regains] ni rcrexhrént pus !!!
Li four fåtchî, i l’ faleut tourner al fotche, å rustea ou bén avou l’ piteuse (feneuse a shijh fotches) ki purdeut deus bates di raezete. Et tourner et rtourner deus ou troes côps. Pu on l’ meteut a hougnes [andains] avou l’ grand rustea å tchvå po fé des hopirons po kékes djoûs. Si l’ tins mancive, on fjheut des gros hopeas avou troes, cwate hopirons po l’ mî såver. Si l’ tins esteut å clair, on fenéve li four al tere et on l’ tcherdjive al hougne, et la, les femes et les efants sujhént padrî po rusteler avou les ptits rusteas d’ bwès ou l’ grand d’ fier.
Cwand on-z av’ des belès trimblenes, on les meteut sovint a gades [chevalet] po wårder li pus possibe les foyes, et po-z aveur on boket ou deus foû des pîs.
Di ç’ tins la, on rintréve li four e vrak.
20, rue Kennedy
4840 Welkenraedt