Mère, è nosse pré, dji vin d' ôyî 'ne fåbite
Ele sont si doûces sès prumirès tchansons !
May a sèmé sès blankès margèrites
Dès bouquèts rôses si mostrét so l' claw'çon
Les-åbes ont r'pris leû corone di vèrdeûre
Et l'årdispène so lès håyes va flori
Mére, l'oûhê tchante èt portant mi dji pleûre
E meûs dès fleûrs, mi fârè-t-i mori ?
A l' sise, è pré, qwand dji m'aléve assîr
Mére, vos l' savez dji n' esteû måy tot seû
On vizèdje d'andje a m' costé vinéve rîre
Tot m' caressant di sès deûs oûy si bleûs
A l' vwès d' Lucèye, mi coûr batéve di djôye
Dji rouvîve tot, tot l' vèyant-st-ad'lé mi
Come èle pleûr'rè, qwand dji serè-st-èvôye
Mère, dji l'inme tant, mi fârè-t-i mori ?
Essonne èfants, nos djouwîs d'vins l' prêrèye
Tot qwèrant l' fleûr catchèye è vért mossê
Si min d'vins m' min, dji coréve avou lèy
Di tot mès sondjes, c'esteût dèdja l' pus bê
Lès frissès rôses rivinront co bin vite
Avou Lucèye, n'îrè dj' pus lès qwèri ?
Mère, vos plorez…_ fåt-i pår qui dj'èl qwite?
Dji n'a qu' vint-ans, ni m' lèyîz nin mori.
Ortografeye do livret del sitroete plake « Chansons wallonnes », CRIWE, sins date