C’est mi qu’est l’fèye d’à l’ cinse
Tot l’monde mi veut voltî
Pus d’on jônnai, ji pinse
Mi vôreut bin fiestî.
L’aute’joû j’trova so m’vôye
Jeannèsse, li p’tit vârlet
Qui m’dèrit qu’ji freus s’jôye
Tot l’ainmant, l’pauve valet !
Ah ! si c’n’aveut nin s’tu Jeannèsse
Li pauve Jeannesse, trop ènnocint,
Ji n’dis nin (Bis)
Qui j’n’âreus nin mutoè fait n’foèce
Po lî d’ner si p’tit contint’mint.
Comme j’esteus mâl âhèye
I m’suva disquâ champ,
Ji m’sinta si nâhèye
Qui j’m’assia tot tûsant.
I féve on trisse visège
Et pîléve comme nosse chet,
Po-z-aveur on bâhège
Tot d’hant c’est si pau d’choè !
I n’aveut des violettes
Qui clinchît so mes pîds,
I n’wèzéve nin, l’haguette,
Les côpér sins bambî !
Jè l’s’è prinda mi minme
Po l’s’è mette à m’corset.
Elles sonlî dîre « Ji v’s’ainme »
I d’manéve là, l’boubiet !