Li siyète èt l’ frumihe
Li siyète, d’ avu tchanté
Tot l’ osté
Si trova so ’ne fwèrt mâle cohe
Cwand volît lès blankès mohes,
N’ âyant fêt nou p’tit spâgne-mâ :
Rin so l’ tâve, rin è l’ ârmâ.
Èlle ala brêre al famène
Dilé l’ frumihe, si vwèzène,
Èl priyant di lî pruster
Ine bètchèye, po vicoter.
« Tant ki l’ nivaye seûye èvôye,
Avou profit, voye non voye,
Fwè d’ mi, dit-st-èle, po l’ Sint-Dj’han
V’ rârez vos mitches è-n-on pan. »
Li frumihe n’ in.me nin l’ èpronte :
C’ èst la l’ mwinde di sès dèfôts.
« Ki fîz v’ don, cwand i féve tchôd ? »
Dit-st-èle a cisse grande sins honte.
« Nut’ èt djoû, avâ lès tchamps,
Dji tchantéve, po v’ dire li vrèye
Vos tchantîz ! Dansez, mamèye.
On n’ êde nén les djins trouwands. »