One djonne comére qu’avait d’abôrd trinte ans
Aurait bin v’lu s’mariè maîs n’avait pont d’galant.
Lès bias rubans, lès crinolines,
Lès p’tits côps d’oûy, lès doûcès mines,
Ele sayait d’tot po-z-atirè
L’mouchon dins sès filèts,
Maîs pont n’î v’nait.
A l’fin èle si dècide por on pèlèrinadje
Et vo-l’-là à voyadje.
Arivéye à l’èglîje, èle s’agngnole à l’autè
U ç’ qui l’Viêrge si trouvait.
Li p’tit jèsus avait one tièsse
Qui barloquait èt qui toûrnait
Quand l’vint chouflait
On pau fwârt pa l’finièsse.
Après-awè fini
Do bin priyi,
Ele dimande a l’ Sinte viêrge. En’don, mi bininméye,
Qu’à l’fin di c’-t-anéye-ci dji sèraî sûr mariéye ?
Li p’tit Jèsus faît sine « nèni ».
« Taîjoz-vos, di-st-èle, pitit malapris,
« Lèyoz causè vosse mére.
« Vos-astoz co trop djonne po rèsponde à m’ priyére. »
Li scrijha cial est rprins do studia da Jean-Pierre Dumont.