Hay… Markis… hay…
On vî ome dijheut çoula
Po-z ecoraedjî si vî tchvå,
On vi tchvå ki n’ è poléve pus
Des oxheas avou ene pea dso
Cåzu tot pelé, plin d’ gretes,
Ki rlinéve, haetchant ene tcherete
Les ouys nåjhis, li pea souwêye,
So on bresse di l’ atelêye.
L’ ome n’ esteut nén beacôp pus bea
D’ ene mwin, i tneut l’ coirdea,
Di l’ ôte, agrawyî a l’ schalete,
Des mwins nukeyes totes setches,
Fijhant çoula sins î tuzer,
I dnéve ene tape so l’ coulire.
Li vî tchvå fijheut a s’ manire,
Li tchvå n’ aléve pus radmint,
Ses pîs ferés a clås schipént,
Çoula fjheut des blawetes so les pires,
Des blawetes come des sospirs,
Hay… Markis… Hay…
Markis n’ aveut pus nole foice,
Bablou i rlevéve li tiesse,
Loukive : li voye montéve todi,
L’ atelêye el fijheut sofri,
Ses shabots schipént pus sovint.
Li pezant haernas so ses rins,
Markis loukive li gritchete ;
K’ elle est pezante, li tcherete ;
Ses pîs ridît co ene feye,
I n’ ratna pus l’ atelêye,
I s’ sitåra … emacralé,
Tourna les ouys so l’ costé…
Viè s’ mwaisse, toumé, lu ossu.
L’ ome si hertcha sconte do tchvå,
Luminme n’ è pleut vormint pus ;
Si mwin rida co so l’ coulire,
Les låmes ås ouys, e somadjant,
Lyi tape ene dierinne caresse,
I djha co, leyant toumer l’ tiesse :
Hay… Markis… djans ! hay !
Deus blawetes montît å cir…
Deus åmes po l’ dierinne prandjire…
Li vî ome et si tchvå
Li vî ome et si tchvå
L’ Aberteke,
Li vî ome et si tchvå