(…)
Lu curé Brèyîre duveûne fwèrt vî, èt i-out tos lès mèhins d’lès vîs bounames. Portant çou qui l’acåbléve lu pus, c’èsteût s’mémwêre qui s’racrampihéve avou lu. Ossu, qwand i-aveût dès mwèrts a ruc’mander, i faléve quu l’sacristyin lî scriyahe lès nos so dès p’tits bokèts d’ papî qu’i plôyîve èt qu’i mètéve so l’bwêrd dèl pûrlôtche, duvant mèsse.
Mais l’pûrlôtche vilihéve avou. Qwand Brèyîre intra tot djône è l’èglîse, pos î dîre si prumî mèsse, ille èsteût dèdjà si vîle, si vîle. Ille åreût polou rîre du ci blanc-bètch qui lî gripéve so lès spales èt qui v’néve fé l’savant adlé lèye, qu’ènnè saveût tant, duspôy lès siékes qu’ille ètindéve tchanter lès-orémus’ èt prètchî l’bone parale. Oûy, quu Brèyîre èsteût rakètcheté come lèye èt qu’ille l’aveût vèyou a l’oûve, is-èstît deûs bons camarådes ossi crèt’lés onc quu l’aute. Ca lès-îvièrs sont dârs è l’Årdène. Lu parwèsse n’aveût né tot-fêr li moyin d’fé v’ni l’veûltî du Spå. Lu noû Sint-Djôsèf èt l’èfant Jésus qu’èsteût so sès brès’, ètindît bin sovint djèmi l’pûrlôtche, dèl nut’, è l’îviér, qwand l’cwahante bîhe du Fagne lèsî picîve lès-orèyes. Chaque côp qu’èle djèmihéve, c’èsteût ine cwahâre du pus ou bin one vîle crèvâre qui s’tapéve pus fwêrt å lådje.
On dîmain å matin, Brèyîre monte so l’pûrlôtche. Tos arivant, i veût treûs p’tits cwårés papîs.
« — Tins ! C’èst veûr ! Nos avans oyou treûs mwêrts !
I mèt sès bèriques èt d’pleûtêye lu prumî papî :
« — Mès chèrs parwassyins, nos prierans tot-rade dî påtèrs èt dîs avés po l’åme dè frèzé Pière quu n’s-avans ètèré cisse saminne ».
I prind l’deûzinme papî :
« — Nos dîrans d’min one basse mèsse po l’åme dè bwègne Michél qui vint d’mori l’nut’ passêye ».
I vout prinde lu treûzinme papî. Tins ! Wi-ce èst-i dåré ?
Aha !… Vo-le-la d’hindou èl crèvâre !
« — Dju ruc’mande a vos priyîres… Dju ruc’mande a vos priyîres… »
Tot d’hant çoula, Brèyîre s’a trossî po prinde su canif’ èt vo-le-la qui grawêye après l’ papî.
« — …Dju ruc’mande a vos priyîres… ».
Mais l’crèvâre èst basse. Pus qwîre-t-i a-z aveûr lu papî foûs, pus l’ènancrêye-t-i. Brèyîre cumince a piède pacyince.
« — …Dju ruc’mande a vos priyîres… »
I sowe a grossès gotes. I s’måveure so cist’ åme qu’èst pus vîreûse quu lu èt vola qui s’inteûre one hinelète è deût. Adonc, sintant qu’i n’ årè nin l’ dièrêne, i dit sètch’mint :
« — Dji ruc’mande a vos priyîres, l’åme dè ci qu’èst-èl crèvâre, èt quu l’diale lu-minme nu såreût aveur foûs ».