C'èst nosse vîye vèjine Mélîye; vous savèz bin qu' c'è-st-ène viye aradjêye, don: aradjêye come ène aragne qui toûwerot in peû pou z-awère sa pê.
Tout dêrinemint, èlle è atrapé in fwârt matchèrê. Quand èle bawe, on n-dîrot in tch'vau qu'è lès gourmes. Et èlle è d'djà la lèpe du d'zeûs toute crèvaudêye, tèlmint qu' la morve lî piche fû du néz.
A la wèyant insi mou misériyeûse, lès vèjins lî d'jèt:
- Choûtèz bin, là, Mèlîye, dju n' fijans pôt d' bin du v' vey trin.ner insi avu vosse matchèrê. Vous duvrîz bin 'nn' aler ou docteûr èt l' fer sougner, douwau?
- Ây, ça, di-st-èle, vous n' counuchèz nin lu vî spot qui dit: quand on n' sougne nin in matchèrê, ça dère chîs s'mwin.nes et quand on l' sougne, ça dère quarante djoûs.
Èt nosse Mèliye, qu'est mak'têye come ène vîye Ârdènaise qu'èlle èst, nu prètend nin 'nn' aler trovu l' docteûr.
Vou-la-là, wê, ç' cộp là l' londemwin, qui s' ravèye avu l' rôguia d' dringuèle. Adon, ça c'mèce à la turlipiner in pô d' pus maîs, maline cone in diâle, èle su dit qu' èle wêtrot d' renscontrer l' docteur èt d' lî d'mander qwè a f'jant semblant d' rin.
Ça tumot bin ca c'astot justumint dîmatche lu londemwin. A l' rèchûwe d' basse mèsse, èle lu trousse pou s' trovu jusse durî l' docteûr quand i sortrot fû d' l'èglîje. Et come d' èfèt, elle èst djondant li ou tchapau, pou s' sègner ou bènitî. « C'est l' moumint », di-st-èle dins lèye-min.me, èt èle su mèt à bawer in bon côp. Adon, lu docteûr su r'toûne:
- Bin, ma pôve Marîye, di-st-i, vous 'nn' ôz yink du catâre.
- Bin dijèz, mossieû l' docteûr, di-st-èle t'a rôgiant, qu'èst-ç' quu vous f'jèz, vous, quand vous 'nn' ôz l' parèy?
- Bin, di-st-i l' docteûr, quand dj'aî l' matchèrê, hin, Mèlîye, dju fwais come vous: dju tousse !
Scrît sorlon ene fåve racontêye pa Paul Brolet;
A parexhou dins l' Avni do Lussimbork li 22 d' mass 1983; cisse modêye cial, c' est l' cene do papîscrît, ricopyî lete a lete.