I.
- Moman, purdoz m’ vite dins vos bresses:
Dji croe k’ dj’ a veu l’ Pépé Crotchet
- Ptit arnåjhe ! T’ as co stî trinner
Ou çki dj’ t’ a disfindou d’ aler.
- Dj’ asteu ki pexhive ås tchacåds
Dins l’ rixhea do vevî Honai,
Dj’ contéve ki ç’ n’ ere k’ on crapåd
Ki ramxhyive divins les djonkeas,
Mins cwand dj’ a veu ses crawieus doets,
Dj’ a seu k’ c’ esteut l’ Pépé Crotchet !
- Ça t’ aprindrè d’ aler rôler
Dins les bôjhes adlé les vevîs !
On bea djoû, ti t’ frès apicî
Dé ene fagne, ene gofe u on bî !
II.
- Moman, rasserez m’ dins vos bresses:
Dji croe k’ dj’ a veu l’ Pépé Crotchet !
- Ptit ravachole, ti m’ fwais transi.
Tire tes soketes, vén t’ rapåjhî.
Dji brishléve e-n on pexhotisse
Po vey si mes solés poujhént.
Dji nd aveu d’ keure des ptits tchinisses
Ki grevissént divins l’ bôjhreye.
Cwand dj’ els a avizé did près,
’L ont tourné a Pépé Crotchet !
- Ça t’ serè bon s’ « I » t’ vént haper
Dé on sourdant u l’ long d’ on ri !
Minme li Bon Diu n’ vout pus passer
Triviè des fwès et des brôlîs.
III.
- Moman, ratoirtchîz m’ dins vos bresses:
Seur ki dj’ a veu l’ Pépé Crotchet !
- Ptit arlant, ti m’ vous fé mori,
Ene pôve viye feme ki n’ è pout pus
- Dji m’ vleu bagnî dirî l’ gargouye
Dins nosse pré, al coete des ôneas.
Dj’ a creu ki ç’ n’ esteut k’ ene gurnouye
Ki ramxhyive dins on ptit frexhea.
Dji n’ a måy rén veyou d’ si laid:
Inte ses cwate doets, « Il » a ene pea !
- La çki c’ est di n’ nén vleur schoûter !
Dimefeye tu todi des aiwes:
C’ est la k’ « I » vént voltî rôler,
Dins les fontinnes et l’ long des saiwes.
IV.
- Moman, purdoz m’ so vosse djeron:
Dji so bon po k’ on m’ fote å trô.
- Ptit wespiyant, dji n’ fijheu pont d’ bén
Di t’ co saveur avå les tchmins !
- Dj’ esteu ki rloukive des damjheles
Ki voltént so l’ Wézemwarins.
« Il » a rexhou foû d’ l’ aiwe mo fel,
Avou on pexhon inte les dints.
Mi, dj’ a rabizé ttossu vite
K’ on fonnet k’ åreut yeu l’ eschite !
- C’ est l’ dierin côp ki dji t’ prevén !
Ni t’ va pus tchôkî dé les wés,
Al Goflete u paddé l’ molén
On djoû, « I » t’ î vénrè stronner !
V.
Dispu, Mårtén n’ a pus rén dit,
Mins il aléve tos les semdis
Baloujhner pattavå l’ Praireye
Po poleur pexhî ås graevîs
Et cweri des trûtes dins les basses
Come on tindeu ki rleve ses laeces.
C’ est come si ses djambes l’ î poirtént,
Ca dins s’ tiesse, sovint, i n’ vleut nén,
Peu d’ rescontrer l’ Pépé Crotchet
K’ a ene noere pea inte les cwate doets,
Ki l’ aveut bén emacralé
Pusk’ i n’ si pleut pus espaitchî
D’ l’ aler hanter tos les semdis
Sins l’ vey ascwati padrî lu.
VI.
Ça a duré troes ans å long.
Mårtén esteut come on pexhon
K’ a dandjî d’ l’ aiwe po pleur viker:
Por lu, c’ esteut l’ boere et l’ magnî.
Mins, l’ djoû dvant les Floreyès Påkes,
On pexheu a veu floter åk
Å mitan d’ l’ astantche ås Troes Sås,
Et i n’ esteut ni fô ni sô :
C’ esteut l’ Mårtén k’ esteut neyî.
Il aveut l’ coir fén cschirådé
Come si ene biesse l’ åreut hagnî
Et, avou ses cros, kernaxhî.
Ça n’ pleut esse k’ el Pépé Crotchet,
K’ a deus grands dints et ût laids doets.
Il a scroté li ptit Mârtén,
Eyet s’ mere a morou d’ tchagrin.
Li minme sipôule a stî recråxheye a môde di ptit roman, avou l' tite c’ est todi l’ aiwe ki doime ki neye.