Jèrmin.ne, tote mouwéye, n’aveût nin yeû l’ timps d’ lî doner on bètch à s’ gamin. Èlle a rademint couru s’ catchî padrî l’âye au pîd dès montéyes dèl coû… D’au lon, èle li rawaîte moussî è scole. Èlle a s’ tièsse clincîye su si spale, one mwin au d’zeû d’ sès-ouys, èt one gote coûrt su sès massales…
Come dès maîsses, lès Saunis ont couru s’achîre su l’ banc autou d’ li stûve. Seûr Jèrtrûde a sintu l’ vènéye, faut qu’èle dispaurpîye li binde, lès machî dins tos lès-ôtes.
« Faut bin choûter ç’ qu’on vos dîrè », aveût-i dit s’ papa. Èt nosse Jilbêrt s’î a bin d’vu fé.
Seûr Jèrtrûde a èdaumé s’ djoûrnéye pa one pâtêr divant l’imaudje dèl Sinte Famile : l’Avièrje achîde al tauve, sint Djôsèf, drèssî pad’vant sès plantches èt li p’tit Jésus pad’vant on djon.ne bèdot. Èle n’a nin co yeû l’ timps di-z-achèver lès pârdons qui nosse Jilbêrt ataque :
« Poqwè ç’ qu’i n’ va nin à scole, cit-èfant là ? »
« Parce qu’il n’y avait pas d’école dans son village ! »
Jèrmin.ne lî aveût bin dit qu’èlle âreût dès mantches à mète avou s’ gamin. Mins nosse Jilbêrt èst d’dja sur one ôte coche :
« Poqwè ç’ qu’i n’a nin on nwêr cindrî come nos-ôtes ? »…
« Poqwè ç’ qu’il è-st-à pîds d’ tchau ? »…
« Poqwè ç’ qui l’Aviérje a one grande cote come li vosse ? »…
« Poqwè ci ?…, Poqwè ça ?…
Tot-astok, li cloke di li scole dès fèyes s’a faît ètinde po côper l’ chuflèt à nosse bèrdèlaud. Seûr Jèrtrûde aveût trové do rèspondant sins s’ divu fwârcî. À li tot seû, i vos-aveût èmantchî l’ lèçon à s’ chonance !…
Jule l’aveût min.né à vélo tos lès djoûs à li p’tite sicole, tot rotant fé sès-ovradjes. Jilbêrt, po l’ momint, i s’èfwârceûve su s’ pwèd à fé dès piquetadjes èt dès trèlassadjes. Li pus deur, c’èsteût co do d’vu causer è francès come seûr Jèrtrûde. Po comprinde, ça, ça aleûve co, mins po rèsponde, i lî ariveûve pus sovint do causer come on lî aveût aprins à s’ maujone. Èt pwis, i saveût mia ci qu’i voleûve fé soyu è walon.
L’ôte djoû, il aveût doné on bètch à li p’tite Lisa. I lî aveût doné pace qu’èlle aveût faît bèrwète èt qu’èlle aveût l’ gote à l’ouy : rin c’èst rin, mins one pitite saqwè, ça faît tant d’ bin !
Seûr Jèrtrûde a rademint acouru po lès r’ssatchî èri onk di l’ôte. Il a bin vèyu qu’èlle èsteût mwaîje. Èlle a bèrdèlé su l’ paradis èt su l’infiêr tote l’eûre qui d’mèreûve di d’ l’avant prandjêre. Jilbêrt lî a d’mandé : « Ma Seûr, èst ç’ qui lès tchins vont èn infiêr èto, pace qu’il arive co bin qu’ nosse Diane vint m’ doner on rude côp d’ linwe èt ralètchî m’ massale ?…
Dins l’ coû, lès marons tchaîyenut plic-ploc au pîd d’ l’aube, rilûjants come li fouwau dèl pupe di s’ vî pa, l’Amand. Lès Saunis si distchicotenut d’dja avou lès Mauj’nis èt lès Gob’tindjis po lès ramèchner. C’è-st-au cia qu’ènn’ârè li d’pus. Tant qu’à fé, quand l’ cloke sone po r’moussî, nosse Jilbêrt a rovî d’ fé ci qui s’ man lî a bin r’comandé…
I djambeléye rademint diviè lès pichelotes. Seûr Jèrtrûde taudje one apéye, èlle a vèyu l’ Jilbêrt. I s’ cotape, tot sayant di r’lèver s’ cindrî. Lès marons tchaîyenut, i stramenut tot-autoû d’ li. I tind l’ cwane di s’ cindrî dins sès dints, mins asteûre c’è-st-avou lès bot’nîres di s’ novèle culote qu’il a do mau. Seûr Jèrtrûde s’a avancî. Èle copléye au mia l’èfant à s’ soladjî. Ça n’èst nin l’ prumî qu’èle dwèt r’fachî. Tot si r’lèvant, èle sint lès p’tits dwègts tot frèchs apicî s’ vîye mwin, po lî d’ner, gratis’, on gros bètch. Jilbêrt i aveût mètu s’ cachèt po todi !
Li cia qu’on pinse n’èsteût nin l’ pus mouwé dès deûs !…