C’èst rouflåde divins lès nûlèyes
Pace qui Sint-Nicolèy
Vout fé bårète ciste annêye.
D’vins totes lès cwènes, on s’akêmèye
Vos contrîz ine poy’trèye ;
Kéne kimèlèye håsplèye !
Margaye divins lès nûlèyes
Léhant lès lètes qu’il a r’çû ciste annèye,
Vèyant çou qu’ lès-èfants ont-st-îdèye,
Sint-Nicolèy man’cèye :
« Dj’ènn’ a m-s cint kilos
Dè rider so lès teûts come on sot
Avou m’ bot plin d’ sôdårts,
Di fisik, di canons èt d’ pougnårds.
Dimin, dji m’ va-st-å bårbî ;
Hanscroufe pôrè anfén prinde sès condjîs.
Dji f’rè on pakèt avou mès håres
Èt dj’îrè-st-å Lombård.
Dji so qwite dèl corwèye ;
A m’ toûr di m’ rèshandi èl coulèye,
Èt di m’ mète a r’sondjî
Å vî tins qwand lès-èfants tchantît : »
« Vinez Sint-Nicolèy
Nos-apwèrter dès nézerèyes
Vos trouv’rez nos solés
Ås pîds dèl tchiminèye
I-n-årè sol tåve on hèna po vos ponnes
Dès rècènes qui vos don’rez a voste ågne,
Dès rècènes qui vos don’rez a voste ågne »
Li vèye a télemint candjî !
Minme lès-èfants ni s’ vèyèt pus voltî ;
I-n-a pus plèce qui po lès prumîs ;
Pus ’ne minute po sondjî.
Lès parints n’ont pus l’ timps
Dè lére dès-istwéres a leûs gningnins
Èt c’èst l’ télévûzion
Qu’èlzî fêt rèciter leûs lèçons.
Nos vikans dès droles di moumints ;
Li pot d’ tére asteûre si spèye so l’ pot d’ vin ;
Et si vos-ak’sègnîz li dreûte vôye,
On vos trête di vîle sôye.
« Lèyîz m’ chal è m’ coulèye ;
Ki Noyé, s’ i vout, r’prinse mi toûrnèye ;
Mi, dji m’ va-st-èdwèrmi
Tot tûzant ås-èfants qui tchantît : »
« Vinez Sint-Nicolèy
Nos-apwèrter dès nézerèyes
Vos trouv’rez nos solés
Ås pîds dèl tchiminèye
I-n-årè sol tåve on hèna po vos ponnes
Dès rècènes qui vos don’rez a voste ågne,
Dès rècènes qui vos don’rez a voste ågne »
Pout esse aschoûté cial