Si seûlemint tu p’leûs comprinde come dji m’ sin tote seûle avou twè. Li pîre, c’èst quand nos-èstans dins nosse lét. Quand dji t’ sin dins m’ dos, quand dji t’ètind r’mouwer ou tanfler. Si seûlemint ti saveûs come dji m’ sin si mièrseûle quand t’ès tot près d’ mi. Pas côp, dji m dimande qui qu’ t’ès. Dji m’ di è mi minme, qui qu’ c’èst c’tila, là, astok ? Dji n’ ti r’trove pus. Dj’a bau sayî, dji n’ ti r’trove pus. Tos lès djoûs, quand dji rabroke di m’y-ovradje al vièpréye, dji m’ ratind à r’trover l’ome qui dj’a conu vola doze ans, èt dji tchaî sur twè. Dj’a è l’idéye qui t’ m’as r’prins tot ç’ qui t’ m’aveûs d’né vola doze ans. Dji vouro qu’ tu m’ lès rinye cès momints là qui m’ fyin’ frumjî. Waîte ci qu’ t’as faîs d’ nos deus ! Èwou è-st-i l’ome qui dj’a tant vèyu voltî ? Èwou è-st-i ? Comint è-st-i possibe qui dji n’ ti sôye pus sopwârter ? Comint è-st-i possibe qui dji n’ sé prinde autou d’ mi di n’ pus polu t’ sopwârter ? Tu n’as nin candjî. Tu n’as nin candjî d’on pwèl, adon poqwè qu’ dji n’ ti r’conè pus ?
Po lès rares côps qu’ nos cougnans, c’èst come si dji m’ fouteû one touche avou ç’ qui pind yinte tès djambes. Dji nè l’ sopwate pus. I r’chone à on sotdwârmant coukî su deûs cosséns. On sotdwârmant cotrouwé, r’pachu. Dj’è vou cop, djè vourè todi, tu comprinds ! Tote mi vikaîrîye dj’è vourè. Dins dîj-ans, dins trinte, dj’è vourè co ; ci n’èst nin one quèsse d’âdje. Minme à quatrè vingts-ans vîye, one comére a todi vingt-ans dins s’ tièsse. Ci qu’èle sondje èt ç’ qu’èle vout, c’èst piron parèy. On n’ wâze pus-è causer, min c’èst todi l’ minme afêre. Rawaîte-tu ! Tu d’meures là sins rin dîre. Mins dîs one saqwè, ratind tot, ni m’ laî nin tote seûle !
Mièrseû avou twè
Si seûlemint tu p’leûs comprinde come dji m’ sin tot seû avou twè. Li pîre, c’èst quand nos-èstans ad’lé nos soçons èt qui t’ causes su nosse dos avou l’aîr do dîre : on n’ mè l’ faît pus. Quand tu faîs chonance di t’ foute di mès laîds p’tits dèfauts adon qui dj’ sé bin qu’ tu n’ lès sopwâtes pus. Qu’i t’ mètenut su tès niêrs. Quand tu m’ dimande do fé one saqwè qu’ dji n’ sé fé, èt qu’ t’as bon pace qui dj’ nè l sé fé. Si t’ sâreûs come dji m’ sin mièrseû quand tu nos prusintes come deûs compeûs d’ bousse, adon qu’ nos vikans quausu chaque di s’ costé. Si t’ sâreûs come dji m’ sin mièrseû chaque côp qu’i t’ faut one rèsponse à tès bièssès quèsses, quand tu vous qu’on cause po disnukî nos problèmes, po qu’on s’ dîye ci qui n’ va pus yinte nos deûs, nos muwadjes, nos sintimints. Qu’on lès scrîye su papî, s’on n’ sé comint lès dîre, po trover à mia raclérî ç’ qui n’ va pus. Èt mi, dji sondje : po mia lès machurer, lès r’machî tot spès. Come dji m’ sin mièrseû quand tu canlètes à mès-orâyes po rapaujeter tès peûs. Adon qu’ por mi, tès peûs, c’èst do n’ nin volu m’ prinde come dji so. Si tu saveûs come dji m’ sin mièrseû quand dji lî dins l pârfond d’ tès-ouys qui t’ vôreûs qui dj’ fuche on’ ôte ome.