J’a st-on galant qu’m’aime comme ses oûyes
Et qui n’hante qui mi po l’joû d’hoûye,
Dèmon, savez, c’est lu qu’èl dit ;
Sins cèsse i m’èl rèpette todis.
Il est vormint bon comme dè souke,
I fondreut bin qwand c’est qu’j’èl louque ;
I dit qu’mes oûyes sont des falots :
C’est damage qu’il est si jalot !
I sét qu’j’ainme dè fer dè clignettes
Et d’rinde sots comme des lamponettes
Les jônnais qui toumet st-à m’deugt,
Afiss dè rire ine heure ou deux.
Portant, ji n’fais nin mâ po l’câse,
I sét bin qu’ji sos d’ine bonne pâsse,
Ca ji n’ainme qui lu dai, l’grand sot !
C’est damage qu’il est si jalot !
A Lîge, parès ji sos chervante ;
On est contint d’mi, ji m’è vante,
Ossu mes maisse ni porît nin
Vis dire aute choè d’mi qui dè bin.
I n’a seul’mint qwand j’vas so l’rowe
Qui j’rinteure on p’tit pau tâdrowe
Et m’galant pinse qui jè l’trompe co :
C’est damage qu’il est si jalot !
I sét portant bin comme ji l’ainme,
Ca jè l’magn’reus tot comme dè l’crainme.
Qwand c’est qu’j’a m’joû, ji n’mi sins pus
Po sorti m’soèrêye avou lu !
Min, volà, s’ji n’poléve pus rîre,
J’ainm’reus mîx dè fini m’cârîre.
I s’mâvelle bin, min c’est vite tot.
C’est damage qu’il est si jalot !
Qwand n’sèrans d’vins l’grande confrairèye,
Mafrique, ci n’est pus là qu’on rèye ;
I s’pout bin qui nos ramassrans
Deux, treus gnaignais qui n’s’aclivrans !
J’ain’m’rè st-âssi bin mi-homme qu’ine aute
Et ji porè rotter l’tiesse haute.
Ji n’frè qui m’manège et v’là tot :
Et mi-homme ni sèrè pus jalot !