Cwand on towe on live ou on lapén, on vude li vexheye tot l’ prindant avou ene mwin pa ses pates di dvant, et tot tchôcant so s’ vinte avou l’ pôce di l’ ôte mwin.
Å mitan des anêyes céncwante, li campagne condruze ni shonnéve waire aveur candjî å long des siekes. Ele dimoréve discôpêye a dominnes erités del colonizåcion rominne.[1] Les tchesteas avént djusse pris l’ plaece des villas et les monsieus l’ cisse des rdjetons des vîs sôdårds da Cezår.
Li tchesse esteut co todi l’ priviledje des ritches et l’ ratind-tot[2] esteut l’ noere biesse des grands prôpietaires.
Portant, do djibî, end aveut a trûlêyes. Des lives, des pietris, des faizans et des lapéns. Des lapéns (li grijhe pesse po les cinsîs), endè fjheut plin les bwès et les tchamps. C’ est ki les tracteurs et les pwezons tchimikes n’ avént nén co ataké a distrure li veye såvadje…
A l’ fén des batowes, i gn aveut des cintinnes di pîces å tåvlea. Mins rén a vey avou les cenes d’ asteure, wice ki les grossès fôrtunes egadjèt des gåres inglès po fé s’ enûler dvant les tireus des meyes di faizans et d’ canårds aclevés dvins des treyes. C’ est k’ on n’ voet må pus l’ noere betchete di l’ oraye d’ on live ou l’ pitite blanke cawe d’ on lapén. Et ça fwait ene bele tchoke ki l’ pietri a disparexhou, minme so les tåves des restorants.
Po l’ tchesturlin, si batowe, c’ esteut l’ grand djoû del såjhon. Li djoû d’ l’ awousse po s’ djibî. Awousse k’ i moennéve avou ses amisses et ses vijhéns. Et come po l’ frumint d’ ses frudjantès teres, li tins djouwéve si rôle. Mins, k’ i plouye ou k’ i luye les cwate solos, les cis k’ on n’ s’ endè poleut passer, c’ esteut ces omes la, des mandayes ou des halcotîs, ki rotént tot do long do djoû åd triviè des ronxhisses, des broûlîs et les basses tot fjhant des brrrr, brrrrrr et toker les bôrs avou leus bastons po ndè traker foû plomes et poyaedjes. Des ptitès djins ki come leus tåyes l’ avént fwait divant zels, si crevintént å siervice des mwaisses. Mins ça n’ espaitchive nén d’ esse des araedjîs trakeus ki n’ årént nén volou manker l’ batowe. Åresse, li gåre el sepeut bén et, dismetant k’ on sierveut l’ borgogne a l’ tåve å tchestea, li botaye di peket passéve di boke a boke adlé les trakeus. L’ après-nonne end aveut kéconks ki halcotént ene miete so leus djambes et, do costé des tireus, on flitchive bråmint.
Ci djoû-la, après les troes côps[3], come les tchesseus, el fizik å lådje et distcherdjî, si rashonnént, n a ene sakî ki lzî vna dire k’ i n aveut-st on trakeu k’ aveut stou touwé.
Sol côp, tolmonde dimora ståmusse.
Pu n a onk di zels ki dimanda, sins djinne : « L’ a-t on bén fwait pixhî ? »
Mwaisse modêye eplaideye dins l' live Dumont Gaspar, 2022; ene miete rarindjeye cial, avou on tchapea et des pî-notes.