A Singapour, fin mièrseû divant s’ copioûtrèce…
Tot djouwant avu les cwårts di s’ patron…
I displome li banke dèl royinne d’Inglètére èt fè tronnèr les martchîs å tites dins l’ monde ètîr…
Nick Leeson, âdje: 28 ans; mèstî: golden boy
avu nost advizeû po l’èconomyince, Biyèl Dåbî.
Li Rantwèle: - C’èsst à n’ nin creûre, dwô, Moncheû Dåbî, k’one banke come li Barings fuxhe blantchîye à cåze d’one seûle djint?
Biyèl Dåbî: - C’est l’ vrêy, nérin. L’avoz lîjhu come mi dins les gazètes!
L.R.: - Èt dèl fåte d’on ptit djonnea ki n’est nin co rsuwè padrî les orayes.
B.D.: - Vingt yûte ans - et toutes ses dents - èt k’i n’ les aveut nin co, parit.
L.R.: - Comint k’ ça s’ put bin fè, don ça?
B.D.: - Il a bîytè come on sâkè djouweû d’ cåtes, u d’ kine[1]; u là come z avîz dinltins les cokîs èt les colèbeûs. Udôbin les arèdjîs après l’ fotbal.
L.R.: - I fåt des monceas d’ cwårts nûzomes, dandjreûs, po splomèr one banke come li Barings - li banke dol royinne d’Inglètére. Èyusk’il aleut cwèri ces liyårds-là, hê, li.
B.D.: - C’est c’ ki v’ distrompe. Avu l’ tècnike des futûres[2], les somes mètûwes o djeû ni sont nin si strôrdinêres ki ça. C’est c’ k’on lome l’èfèt djîze[3]. Si vos gangnoz, vos gangnoz gros. Mins si vos pièrdoz, z astoz pol diâle èto!
L.R.: - Cwèski c’est d’ ça po yåk, ô, ces futûres-là? C’est come z avoz l’ Belfox sol martchî ås tites di Brussèle, nonna?
B.D.: -Oyi, oyi. Mètans les Molins dèl Royinète di Hoûtsiploû ki fjèt des torteas po les bièsses. Il ont fwêt martchî avu les pwartchîs po vinde, dju dîrans l’aliment « moyinê »[4], à 10 F do kilo. Åy mins non pus, si l’ mayiss rimonte èt rdoblèr d’ pris o mwès d’ djanvî, udôbin ki l’ dolår rizoubèle à 40 F come ça nos pind å nez, usk’èlle îrè, leû gangne? Por zèls n’ avu nole sêzine, i vont acatèr on waranti po zèsse ayèssî tote l’annêye à 5 F do kilo.
L.R.: I n’ handlèt nin avu leûz acheûrance, po ça?
L.R.: - Nèni. C’èsst one banke come li CERA ki lzî atchète one futûre sol martchî ås dinrêyes (ås dvêres) di Chicago. Li vindeû dèl futûre ramasse les primes. Si l’ pris du mayiss ni bodje nin, i mèt ttafwêt ol tache èt il a bin gangnî s’ djoûrnêye. Si l’ mayiss rimonte, nérin, adon, il èsst oblidjî d’ènn acatèr èt dèl rinvinde à piède. Mins to sins bin k’ tos ces çanss-là, i n’ les aveut nin mètu ol cagnote li djoû k’il a vindu l’ futûre. I travayint d’on ôte des costès. Ça fwêt ki l’ djoû k’i fåt k’i paye si mayiss, il est d’ kèssion k’il åyixhe les rins stocass, dê.
L.R.: - Èt c’est ça k’ Nick Leeson a alkinè[5], dabôrd, li?
B.D.: - Nin vormint. Li, il acatéve tot li mzèra[6] do martchî ås tites di Tokyo. C’èsteut on djeû d’ tirlibibi so on ôte djeû d’ tirlibibi (l’èfèt sordjîze).
L.R.: Ci côp chal, djè n’ vos sû pus, là!
B.D.: - Ça n’ m’ètone nin. Ces martchandîjes-là, dayeûrs, on dit k’ les patrons d’ bankes k’ont puss di 40 ans n’î coprindèt rin laddins, èyè k’ les djonnes èwarès did monss ki 30 ans fjèt n’importe cwè avu.
L.R.: - Come z avoz li Nick Leeson?
B.D.: - Come z avoz li Nick Leeson! Il aveut wadjî ki l’ martchî ås tites di Tokyo aléve gritchî pâr. Ç’a stî djusse li contrêre. Après l’ tronnmint d’ tère di Kobe, il a fougnî dins tère, oyi. Èt là come les fonds d’ pinsion, zèls, ki dvèt payî leûs pinsionès ol fin do mwès, èt ki comptint, po ça, vinde des tites so Tokyo? Mins il èstint pus malins, zèls: i s’avint acheûrès avu des futûres. Ça fwêt k’ c’est li Barings ki lèzî a rpayî l’ difèrince.
L.R.: - Ayi, èyè inlà, c’est l’ royinne d’Inglètére k’a payî pol pinsion des ptitès djins. C’est co on bea côp dé on lêd, dabôrd?
B.D.: - Vèyu di c’ costè-là, oyi!
Eplaidî so foyes agraptêyes, avou intiesse: Li Rantwèle, mwètî, n° 0, (4), rèchu so Star SJ-144 vinant di Microsoft Word 6.0 li 8 di måss 1995.
Evoyî a ene vintinne di djins e moes d' måss.
Li prumire pådje do foyou, c' esteut deus esplicants årtikes e francès saetchî del gazete economike « L'Écho » do 28 di fevrî 1995. Gn aveut ossu on ptit adjinçna mostrant mecanicmint l' « efet sordjîsse ».
L' årtike e walon esteut sol deujhinme pådjes, avou kékes ratournaedje e francès dins l' tecse, riprinjhes ciddé ådzo
Pî-notes