Bondjoû bondjoû ! Bondjoû Françwès ;
Did lon, dji vs a veu ariver (arivè).
Et tot d’ on côp, dj’ m’ a decidé (dècidè)
C’ est vos ki dji m’ va controler (controlè).
Ça m’ va foirt bén, nosse dame li policire ;
I m’ va co bén, ça a ddja stî pire.
Portant, i m’ fåt… i mel vos fåt bén dire :
Dji n’ voe pus bén, dj’ so crevé plin.
C’ est ene tatouye ki dj’ ramassa
E cåbaret di vosse popa.
Mins ça n’ fwait rén, nosse dame li poliçresse
Tårdjans ene miete, gn a rén ki presse.
Tot doûs tot doûs, tot doûs, tchåfeu ;
Gn a nén dandjî d’ boerler å feu.
Dj’ clôrè les ouys, do moens ç’ côp ci ;
Mins vos m’ divoz dner vosse permis.
C’ est come di djusse, nosse dame li policire ;
C’ est vosse mestî ; gn a rén a rdire.
Portant i m’ fåt… i mel vos fåt bén dire,
La ddja des anêyes k’ on m’ l’ a rpris.
Vos divnez rodje – c’ est ddja comike –
Come li foye do controle tecnike.
Savoz bén cwè, nosse dame li poliçresse,
Dj’ a håsse di toumer dins vos bresses.