Do tins ki dj’ vos cåze (1953), vos estîz kécfeye co dins les cabus u dins dins l’ tchena del ciwagne k’ apoite les efants. Po n’ nén dire on ptit djermon dins les boûsses di vosse pa. Mins mi, dj’ esteu dedja avou m’ mouzon ki rwaitive li posse ås imådjes.
Li tévé ki dj’ vos di esteut metowe å fond di nosse botike ås loumires, djusse a l’ adroet del finiesse. Insi, les djins ki passént el polént rwaitî d’ estant sol pavêye.
Dji fjheu don come tertos. Di l’ ivier, dji m’ rafûléve avou wants, bounete ey echerpe, et dj’ aléve sol pavêye. Lavola, gn aveut ddja ene triclêye di pwaires d’ ouys, grand å lådje, ki rlouként li novea pitit caliguluk.
Mononke Tchåle åreut bén yeu fwait on fime a lu tot seu. Cwand Lino Ventura — k’ i loméve « li dogueu ! » — arivéve « sol sinne », i cmincive a fé aler les bresses di tos les costés. Avou s’ canote di triviè, et l’ tchén d’ cigarete ki pindeut après s’ lepe do dzo, i fjheut les cwanses di s’ bate ås côps d’ pougn avou nosse Lino, tot boerlant : « Wai ! la l’ dogueu ! To vas vey ene sacwè ! »
On pleut bén waitî a lu, po n’ nén ramasser onk di ses côps d’ pougn dins s’ djaive, et toumer la divant l’ fén do fime, sins sawè kî çk’ aveut wangnî (li dogueu, assuré !).
C’ est d’ bele cwand gn aveut do fotbal ! Li pere Mostene rintréve li tévé dins l’ « måjhon ». C’ est come çoula k’ on loméve li mwaisse plaece-bas, ki fjheut coujhene et såle a magnî, et la k’ on s’ poleut ashire po waitî. Et les omes do viyaedje : « Ça fwait k’ Alfrede a rintré l’ tévé. Alans lyi dire bondjoû, mins ni rovyîz nén l’ louwaedje del måjhon : ostant d’ trapisses ! »
Des Rotchfoirt, come di djusse ! C’ esteut a ene pixheye di Yon, et on les aléve cweri direk a l’ abeye, et les tcherdjî so nos velos. Des djoûs k’ i gn a, mononke Tchåle kimincive dedja a les boere so plaece. Et, s’ il esteut trop sô po rivni, i lodjive mon les moennes, et rariver l’ londmwin do matén.
Padecô, gn aveut ene des lampes ki petéve tins do match. Mondju todi ! Vos årîz veyou li ké disdut ! Nosse pere bizéve djus dins si ovroe k’ esteut e l’ cåve. Ene munute après, i radåréve avou l’ boesse ås lampes di scours, k’ i tneut bén precåcioneuzmint, come onk ki poite li Bon Diu. I faleut co trover l’ boune, aprume dire ses priyires po k’ i gn åye co di ç’ sôre la. Les rwaitants estént so des tchôdès braijhes. « Nodidju, on va rater les gôls ! Dispaitche tu don, Alfrede !»
Mins, al fén des féns, cwand il aveut tot naxhî dins l’ boesse, i rexheut todi l’ boune lampe, et l’ mostrer a tertos, come li prestidoetî ki sôrtixh li robete foû do tchapea.
Des côps, i nivéve dins l’ waitroûle : dj’ ô bén k’ les imådjes estént brouyeyes, et l’ son raetchotéve. Adon, nosse pa diveut monter sol toet po rmete l’ antene do bon costé. I s’ kitoirdeut come on vier, po n’ nén dmorer a stok dins l’ barbakene, k’ esteut mo stroete. Cwand i ndè vneut foû, il avneut so l’ grosse plake la k’ on aveut assudjeti ene adjeyante antene. Neni, ci n’ esteut nén l’ Tour Efel, mins avou ses coidlaedjes et ses bresses di tos les costés, on pout dire k’ elle aveut d’ l’ aleure.
Les rwaitants ‒ ki n’ savént pus rén rwaitî ‒ s’ adjoként al cawêye dins les montêyes, k’ i nd aveut troes volêyes.
La-hôt, nosse pa esteut ki fjheut d’ l’ ekilibrisse po tourner ene miete l’ antene, sins s’ epîter dins les cåbes d’ atna. Louke k’ il åreut yeu volé al valêye ! Et on dit k’ a Yon, c’ est des couyons !
Adon, i dmandéve ås ôtes : « asteure, ça va mî ? ». I transixheut d’ ôre li response. Adon, li tchinne des omes fijheut dischinde li messaedje disca l’ måjhon, et fé rmonter les racsegnes. C’ esteut come ene pîce di teyåte improvizêye, mins come il avént ddja repeté mwints côps ci sinne la, ça aléve come do papî al muzike. Portant, zels eto fijhént les ekilibrisses, tchaeke so èn apas des montêyes. I faleut comprinde cwè, et l’ repeter å ci do dzeu u do dzo, tot tournant les talons d’ on cwårt di toû… sins s’ toirtchî l’ pî !
Li telefone arabe rimontéve don les troes plantchîs del måjhon, et trevåtchî l’ barbakene, po-z avni ås orayes da popa.
« C’ est ddja ene miete pus clair, mins gn a co del nive ; asteure, ça n’ nivtêye pus si foirt ; a ! ni bodje pus a rén : c’ est clair ! »
Adon, nosse pa s’ rissouwéve si front… pa abitude, pask’ i fjheut sovint cayant d’ froed, al miercopete do toet. Schapé, èn ome ! I s’ pleut rwinner a l’ evier dins l’ barbakene, les pîs les prumîs, et rtrover l’ boune tcholeur do feu e l’ aisse.
« Mondju, Alfrede, vos estoz tot edjalé. Vinoz vitmint boere èn ocso po vos reschandi ! »
Et, la-hôt sol toet, gn aveut ossu des binåjhes : le ptits moxhons ki s’ alént poleur rapîçter so ç’ drole di bouxhon la, avou des coxhes et ses coxhetes totès droetes.
Li « måjhon » - li mwaisse plaece-bas ki dji djheu voci ådzeu - di nosse pitite måjhon d’ ovrî sierveut a ttafwait. Nén seulmint a rloukî l’ tévé, cwand elle n’ esteut nén dins l’ håynaedje e botike. Mins, avou, a magnî, a fé a magnî et pår a-z î planter l’ sapén d’ Noyé. (O ! nosse sapén d’ Noyé ! C’ esteut ossu on caliguluk, avou les loumrotes ki cligntént, et mågré les guirlandes « tchiveas d’ andje » ki piként ostant ki l’ grete-cou.)
C’ est cotodi dins ç’ plaece la k’ on fiestixheut nos ans.
Et pu, cwand on pindeut on noer tåvlea après l’ rampe des montêyes, ele divneut scole. C’ est la k’ on-z esplikéve a Emile li problinme do batch d’ aiwe k’ on rimplixheut et vudî e minme tins.
Emile, c’ esteut l’ vijhén. Il aveut des rondès berikes ceclêyes di noer. On bråve valet, mins c’ esteut nén di s’ difåte ki les rinnes n’ ont pont d’ cawe. I lyi faleut spliker et respliker et racaspliker, disca tant k’ nosse mame veyeut bén k’ i gn av pont d’ avance, et fé djoker li lçon.
Dji m’ sovén d’ on côp ki nosse pa lyi aveut scrît ene luçon d’ electrike å tåvlea, li lwè d’ Ôm si dj’ el tén bén. Mins nost Emile n’ arivéve nén. Et faleut aprester a soper.
« Djanine, ça vos va si dj’ lai l’ tåvlea pindou, des côps k’ Emile arivreut. »
Mins pont d’ Emile. Nosse pa raguidéve co on côp ses esplikêyes di professeur. Binåjhe come ene poye k’ a trové on vier, ene djin, di co sawè tot ça ! Mins come Emile n’ esteut nén cotodi la, i disfaça totafwait. C’ est a ç’ moumint la… ki nost Emile s’ apoenta.
Ådjourdu, « li » tévé, c’ est da minne. Da mi et por mi tote seule ! C’ est come ene erlike. Nonna, dji nel rivind nén. Djourdidju nonna ! Nén co po ene bleuwe vatche !
