Novèles èt Binde à dèsséns/I
Ciste ouve ci egzistêye eto divins ds ôtès ortografeyes : Rifondou walon.
I
Mwaîs Novia, boune novèle ?
Fafa në s’vèyéve ni fwârt volti ! Mins adon pîre quë tot ! Dès côps èle së vèyéve trop spèsse, trop coûte dë djambes, oudobén, èle sondîve qu’èlle avot dès djambes come dès brocales avou dès fèsses dë gade, plates come dès plantches. On côp, trop grande, on côp trop p’tëte, on côp trop nwêre dë tch’fias, lë lèd’dëmwin, trop brëne. Èle së d’djéve qu’èle avot on nez come one petote dë bèveû d’ vén rodje, dès-ouys come dès këkënes dë poupous’. Sès dints, come dès brokes dë viole, què lî fyîn’ one bouche come on rèsselî.
Quand èle së r’nètîve pa d’vant s’ murwès dëvant d’aler dwârmë ou quand èle se dësmoussîve, èle sèréve sès-ouys. Quand èle passéve dëvant l’ vëtrëne d’on botëque, èle toûrnéve së tièsse së l’ costé po n’ ni s’ rawaitî. Èt s’ë-n-avot on potia, èle sauteléve dëdins à djons pîds po n’ së ni veûy dëdins. « Djë n’ më vwè ni voltî, djë so trop laîde. » qu’èle rèpètéve à s’ man tot l’ lon dèl djoûrnéye, à s’ pa, à tos lès-èlèves à scole.
Adon, tot l’ monde lî d’djéve, « Mins non.na, ça n’èst ni vraî, quë t’ès bièsse, më crapôde, dë t’ mète dès parèyès-ëdéyes dins t’ tièsse. ! »
Mins Fafa ossîve sès spales, toûrnéve së tchaur po s’ènn’aler avou sès deûs mwins dins sès potches, sins volu crwêre cë qu’on lî d’d’jéve. Cèstot pîre quë fwace dins s’ caboche d’èfant : « Së t’ crwès ça, t’è crwèrès co bén d’s-ôtes, ça s’a passé al cinse èwou quë l’ tchén bat l’ bûre avou s’ quèwe ! »
Vola d’dja on bon momint qu’ ça dëréve, èt v’la-t-ë ni qu’a-st-arëvé on novia èlève dins së scole. Come chaque côp qu’ë-n-avot on novia qu’arëvéve , tote lë scole èstot rachonéye autoû d’ lë dè timps dèl rècrèyacion, po sayi d’yèsse camarâde avou lë.
Tortos, ël avîn’ dëmandé qwè èt quèsse. Èt, ël avot rèspondë quèsse èt mèsse, à tortos.
À paurt nosse Fafa, quë n’avot rén d’mandé ! Ét quë s’ tënéve astampéye, së tièsse bachîye come à s’t-abëtëde, tote seûle dins one cwane dèl coûs.
Lë novia gayârd l’a v’në trover : « Èt vos, vos n’ m’avoz rén d’mandé, comint ç’ qu’on vos loume ? »
« Fafa » a-t-èle rèspondu.
« Poqwè t’noz vosse tièsse clincîye ? »
« Pace quë dj’ so trop laîde, Pace quë djë n’ më vwè ni volti ! »
Lë novia l’a lonmint r’loukî dès pids al tièsse. Ël a findë sès lèpes, chënârd, po lî dîre, : « T’as bén raîson, t’ès vraîmint laîde come on pû. Djè l’ vou bén crwère quë të n’ të vwès ni volti ! »
Tot l’ monde a d’m’èré pèté, lë bouche grande au laudje, lès ouys come dès sarlètes. Tote li scole a rawaîtî l’ novia s’ènn’aller sins rén dîre.
Fafa, èle n’avot ni boudjî d’on cran. Èle n’avot ni r’lèvé s’ tièsse. Mins , ç’ qu’èlle avot ètindë, l’avot flayî come on côp d’ mayèt al mére copète dë s’ tièsse. Ét en d’dins, ça chiltéve d’arèdje !
Saquants-eûres pës taurd, rabrokéye à s’ maujone, èlle a grëpé lès montéyes quate à quate, moussî dins s’ tchambes, rauyî l’ drap d’ mwin quë catchîve së mërwès èt s’razouyî on fèl côp sès-ouys dins sès-ouys.
« Lë boû, mins po quî s’ qu’i s’ prind dë m’ causer come ça, l’ènocint quatôze ! Ë s’a d’dja r’loukî, lë ? Non mins ! I s’ prind po Tarzan ! Ë n’ s’a jamaîs vèyë avou s’ nez dë d’ trëviès, èt sès tch’fias come dès loyéns d’ via ! Èt sès brès : së télemint long quë t’ dîros qu’ë vont trin.ner al têre come lès planteûs d’ chëcons. Èt s’ bouche, të dîroz qu’on lî a spotchî one fréje al place. Èt ë faît co dès-ouys come one caracole è coutche, onk quë djète lë stauve dè timps qu’ l’ôte è-st-à campagne ! Djë n’ so quéquefîye ni bèle, mins dë d’là à m’ dîre quë dj’ so laîde...Èt, ël a l’ front d’ mè l’ dîre : lë Quasimodo !
Waîte më nez, ël èst fin drwèt, ni trop lon, ni trop laudje. Mès-ouys, ël ont one byin bèle brëne coleûr. Djë m’ pou mète dëzo l’ twèse, djë n’ so ni trop grande, ni trop p’tëte. Mès tch’fias, â ! qu’ë sont bias d’ssus mès spales... Èt mès dints, taudje quë dj’ rawaîte on côp... Maria todë : djë wadje qu’ë-n-a wêre qu’on dès së bèles èt blankès dints qu’ lès ménkes. Èt quand djë find mès lèpes, të dîros veûy Sharon Stone ! Djë so... Oyë ! Dj’a lès pinses quë dj’ so byin pës bèles quë branmint. Faut ni oyë peû dè l’ dîre... Â ! Oyë, faut bén r’conèche quë dj’ n’ so ni mau, one fwârt bèle crapôde ! Quand djë pinse quë l’ novia a wazë dîre quë dj’èsto laîde. Ë n’ m’a ni vèyë ou qwè ? Ë lî faurot dès lënètes ! Démon, rosse, pwèson ! Nos n’avans pont d’ chance dins nosse sëcole : n’avot-ë nin moyén d’ tchaîre on côp d’ssë on bon novia al place d’on mwaîs ?
Dëspôy cë djoû là, Fafa à èdaumé a s’ trover bèle au d’là, èt à s’ veûy volti. Èle rawaîtéve li novia à bachète, quand èlle èstot seûre qu’ë nè l’ razouyéve ni. Lë, ël avot todë sès lèpes findouwes quë r’chonîn’ à dès spotchîyès fréjes èt dès droles dë s’twèles dins sès-ouys dë via. Quéquefîye ni dès-ouys dë via, putôt dès-ouys di lapéns ou d’ daguèt, pinséve-t-èle Fafa, à mèsëre quë l’ bon timps avancëchéve, èt qu’ lès fréjes meûrëchin’... Â ! Lès fréjes !
« À î rawaîti à deûs côps, c’èst qu’ c’èst bia lès fréjes èt pwis c’èst bon ! Èt on n’èst ni oblëdjî d’ lès spotchî. On pout èto jusse lès rëfler, lès-ouder, l’zeû d’ner on bètch, on tot p’tët bètch. Tot dous, Tot dous... » qu’èle së d’djéve Fafa .