Novèles èt Binde à dèsséns/III
Ciste ouve ci egzistêye eto divins ds ôtès ortografeyes : Rifondou walon.
III
Lë tasson èt lë r’naud
Dins on pës’ aux pîres, së lë d’zeû d’ Gobtindje, on skèrpë tasson avot batë s’ maujone : deûs grandès pîces èt trwès laudjès tchambes.
On djon.ne rënaud, tot vèssë, passe pa d’vant lë quë përdéve lë bîje së l’ pîre dë s’t-ëch, èt ë lî dët :
« Dëjoz m’ camarâde, djë so-st-èdjalé mwârt, vos n’ârîz ni one place por më ? »
Lë tasson quë s’ faît aujîyemint à tot èt quë n’èst ni nâreûs por one mastoke lî rèspond :
« Quand ë-n-a dè l’place por onk, ë-n-a dè l’place po dîj’ : përdoz l’ tchambe quë v’ v’loz, insë, nos n’ sèrans ni tot seû po passé lès nîves. »
Lë rossia èt l’ nwêr aus blankès massales ont chaque trové one mayon po s’ mète è min.nadje.
Tot l’ long dè rë, dins l’ rëvadje, lès-arondes on anoncî l’ bon timps.
Bén rade, lë têréye à r’choné à on vëj’nauve, èvou dès bauchèles èt dès raupins : dès rossias, dès nwêrs èvou dès blankès massales, èt minmes dès bastaurdés !
Lès maîsses n’ont nin volë d’ ça : dès bièsses quë n’ont rén à fé èchone, c’èst l’ monde à l’aurviêrs. Ë rësquîn’ dè piède leûs drwèts, lès leûrs pa d’zeû tot. On-a raconté qu’ lès pôvès bièsses èstîn’ èradjîyes.
Lès gazètes ènn’on causé ; ça n’è ni novia ! Lès r’nauds èt lès tassons ont stî gâzé èt co bén dès-ôtes prins au cèpes.
Lès-arondes ont pèté èvôye dè l’ rëvadje.
Fioz bén atincion lès bourias, à fwace dè bouter l’ margaye, c’èst d’ssër vos quë l’cèpe së r’claperè, èt lès-arondes rëvêront po anoncî l’ bon timps.
C’è-st-on tasson qu’ vos l’ dët.
Notes Wikisourd
Sicrît dandjreus avou on côp di spale da Emile Hesbois, si on voet l' fråze rawetrece: "Mèrcë branmint dès côps à Emile Hesbois."
Li gåzaedje des terêyes (avou les taessons et les rnåds k' î vicnut eshonne) a bén arivé dins les anêyes 1970, po sayî di dzindjner ene minêye di må d' araedje.