Novèles èt Binde à dèsséns/XI

One gougouye di rawète (Po dès-advèrtiyès djins, nin fwârt acadèmique, mins pos l’ mwins’ : ça vike…)

« Vosse brûleû ? Mwârt djus ! Tapoz l’ aus rikètes èt l’ tchôdêre avou ! »… Dj’a tchandjî l’ brûleû, dji n’âreû nin d’vu… Quand èle n’è volenut pus, cès machines là, on d’vreût l’zi lèyî fé l’ bouneûr d’on gobieû. Poqwè nin ? C’èst l’ minme po nos-ôtes. T’as skèpî tot djon.ne, tot noû, tot bia, mins tu sés bin d’avance qui c’èst po moru. Tu trèbukes, ti tièsse prind l’ cwane d’one pîre. On mau dins ti stoumak ; si fwârt qui t’ès dins l’ vacha sins-awè yeû l’ timps d’ comprinde qui c’èst t’ dêrène bauye. Ti comére t’oblidje à d’chinde li batch au scindes al cauve ; tu n’ rimontes pus qu’ lès pîds d’vant yinte quate plantches ! Bwè do pèkèt, rôle ti toubak, fume dès boulons tos lès djoûs : là, ça pwinterè quétefîye pus rade, mins tu vikerès, t’arès bon. C’èst quand on s’ sint viker qu’on sint qu’on va moru. « Bondjoû, nosse dame ! » Dji taudje. Dji m’èrva. Dji causeû d’ vosse vîye tchaudêre à voste ome. One vîye cârcasse di fiêr, oyî ! Dj’ènn’ âreû one parèye à m’ maujone, djè l’ tape su l’ vôye à côps d’ pîds à s’ ku. Dj’a jusse ritapé l’ bièsse : do proviswêre. Si l’ivièr n’èst nin trop fwârt èt qu’i n’oblidje nin vosse monumint à toûrner dipus qu’i n’ faut ; vos pourôz co vos r’tchaufer al tchaleûr dès radiateûrs. « Au plaîjî, nosse Dame ! » Ç’ côp ci, dji nè l’ dit pus, dji m’èrva ! Vos-ariz on vêre d’aîwe avou on bokèt d’ suke, dji sèro bin binauje. C’èst l’eûre do diner èt si dji n’ prind nin one sakwè, li suk ni va pus r’monté dins m’ song. Dji riskéye do tchaîr flauwe padri m’ volant. On n’èst jamaîs à yute d’one quinte ! Avoz d’dja ètindu l’ tic-tac di vosse moteur bouchî dins vosse sitoumak ? Èt si vos m’ voloz fé on pistolèt djambon-fromadje, ça sèrot co mèyeû. Djè l’ mindjero è rôlant. Dji m’ va avou vos àl cujène. Di ç’ timps là, Monsieû, razouyî bin al bièsse : faut qu’èle toûne paujêre. Si vos-ètindoz qu’èle s’èbale criyî on côp ! Vos-èstoz bin amichtauve, nosse dame, di v’ disrindjî por mî ! Dji vos veû pus voltî qu’ vosse tchôdêre. Èle ni vos faît nin d’ pus d’oneûr qui voste ome avou s’ tièsse di fleûr di Sinte Caterine. « Lèyiz v’ d’aler, lèyîz m’ fé ! » Profitoz-è di m’ bordon do timps qu’i vike co. Èt vos ; sérieûsemint là, vos sondjîz co à ç’ qu’on bon Diu d’ sacré godome, vos va v’nu fé raviker c’ qu’i vos d’mère yinte vos deûs djambes ? On côp qu’ c’èst mwârt ; pus moyin d’ somadjî d’ plaîjîs. Vèyoz, vos v’ sintoz d’dja mia. Ni v’ jin.noz nin, purdoz vosse plaijî. M’n-ostèye sièt po totes nos-abonéyès pratiques qu’ont on contrat po yèsse ètèrtinuwe. C’èst tot jusse li gougouye di rawète qui noste usène èst binauje di vos d’ner divant qu’on n’ vôye sucî lès pichoulits pa leûs racènes dins on ç’mintîre. « Tins, vos-v’là, Monsieû ? » Vos v’loz bin waîtî on p’tit côp pa l’ fignièsse, li timps dèl prinde pa li d’drî èt r’monter m’ marone ? Èt si vos nè l’ voloz nin insi, purdoz l’ dosséye à spale, jusqu’à ç’ qui dj’ vègne co prinde sogne di vosse tchôdêre…