Novèles èt Binde à dèsséns/XV

Jéjé Mévis

Li Jéjé Mévis à dècidé d’ bistoker s’ comére avou on pus djon.ne ome qui lî. Nin qu’èlle ènn’-aveût ausse, non.na, On advine aujîyemint l’ surprîje èt l’imbaras qu’ ça aleûve costé, mins po chaper s’ cope dèl naujichemint après vingt-ans d’ mariadje, Jéjé èsteût près’ à tot, minme à wâsu l’impossube ! Il aveût è l’idéye di mète tos sès liârds dissu on djon.ne ovrî dèl cinse dèl mayeûr, monté come on roncin, putôt qu’ d’ pâyi one samin.ne au club Mèd’ à s’ feume. Li Jéjé, cabaretî pad’vant l’èglîje, vèyeûve tant voltî s’ comére qu’il ènn’-èsteût rwè toqué ! I s’avîn’ mètu èchone po satchî al cwade vola d’ pus d’ vingt-ans, èt leû bouneûr flauwicheût sins novèlès-idéyes. On trop plin d’abutude rindeûve leû djâdén d’ plaîji à sètch. Il èsteût timps d’ médî à ça. D’ayeûr c’èsteût bin mètu dins l’oroscope dissu s’ gazète : - on novia galant ? Poqwè nin ! Trover on gayârd à s’ gout, ci n’èsteût nin si aujîye qui ça.! Li vijnauve n’è compteûve wêre. Il a drovu sès-idéyes al Mèmèr mon l’ Tatôye. Lî, il âreût bin v’lu, mins i n’aveût nin ausse do fé dès miséres à s’ soçon. « Dji voreû bin on djon.ne ovrî d’ cinse. » « Ça s’ pout trouver, mins po qwè fé ? » « M’ rèclame. » « T’ rèclame ? » « Po bistoker Fabiène, lî d’ner do plaîji, èt r’mète nosse cope dissu lès rayes. » « Rin qu’ça, v’la lonmint qu’ dj’ènn’-a pus ètindu one parèye. Dî putôt qu’ c’èst po ti d’ner on côp d’ mwins avou lès pratiques di t’ cabarèt. » Jéjé n’a nin r’lèvé l’ couyonâde. Il aveût d’moré stokasse, mins il à rataqué. « On djon.ne, on solide èt djintî al bèsogne. » « Rin d’ôte qu’on-ovrî al samin.ne ? » « Oyî, Fabiène a todi vèyu voltî lès-awous’. Li djane dès dinréyes, lès stindéyes sôyîyes pa l’ bateûse, lès balots, lès côps d’ fotches à deûs dints qu’ lès-omes fortchîyenut bon wôt d’ssu lès tchaurs. Dji vou lî fé plaîji ! » Jéjé èt l’ Mèmèr’, c’èsteût deûs vraîs soçons, mins ç’ n’èst nin po ça qu’i s’ richonîn’. Onk ni saveût quausu nin lîre, èt l’ôte, pus vî, saveût lîre lès yèroglifes dissu lès piramides come dins-on lîve, lès lètes di d’ pad’zo l’ cingue do dîj-utyinme siéke èt lès cènes dès-omes à cote dèl Chine… . Tot ça po v’ bin mostrer qu’ Jéjé s’ vèyeût voltî li minme, èt qu’i purdeût bin s’ plaîji d’ssu l’ dagne. Mins i n’è causeût qu’a l’ Mèmèr… Ça, c’èsteûve yèsse di soce…