Novèles èt Binde à dèsséns/XVI

À vosse santé

Po mès peûmons, li médecin m’a dît qui dj’ n’aleûve nin moru si rade qu’i n’ pinseût. Li chimio aveût ravalé totes lès nokètes qui dj’aveû d’dins m’ cwârp, èt qu’i pinseût bin qu’i n’ divreût minme pus m’opèrer. Lî, qui m’aveût dît qu’ dj’ènn’-aveû pus qu’ po chî mwès à viker. « Dji v’ done co quinze di chance au cint po chî mwès ! » Dj’aveû somadjî… I s’aveût mwaijelé à m’ taner avou lès sèt cint mile cigarètes qui dj’aveû fumé tot l’ long di m’ vikaîrîye dispus d’ pus d’ cinquante ans. Il aveût yeû l’ timps d’ lès compter d’après lès paquèts d’ toubak qui dj’ach’teûve tos lès djoûs. I n’aveût jamaîs vèyu on cancêr raptitî come ça. I m’a d’mander s’ pârdon, d’awè stî diâle èt s’èpwârter d’ssur mî. Dji vèyeû bin qu’il aveût co dèl râje plin sès-ouys. V’là qu’il èsteût gaîye come on pinson. I s’a churé d’ rîre, tot m’ fiant moussî foû di s’ cabinèt. Dji n’èsteû nin co d’ssu l’ vôye qui dj’a-st-èvôyî one mèssadje à m’ Nènète po lî dîre qui dj’ ravikeû. Èle m’a rèspondu avou trwès : ??? « Champagne, Nènète, Champagne ! » Dj’a sâyî d’ lî causer, mins èle m’a basculé su s’ bwèsse aus rèsponses. Dji m’a pormwinrné à razouyî lès grîjès nuléyes. Li brouyârd rilaveûve lès bas costés dèl vôye crausse di plaîve. Di tote maniére, i faut bin prinde tot come ça vint ! Dji bagneû yinte deûs coleûrs, come dins on film di d’ dins l’ timps : do nwârt èt do blanc. Poqwè nin ; nin dandjî d’ viker plin d’ bouneûr è tèknicolor ! Dj’a moussî dins on botique po m’acheter deûs botèyes di « Chwèt èt Bandon » èt one bwèsse d’oûs d’ caviar. Ça m’a costé l’ pris d’one cope di clicotias d’ôr di quarante caras… Dj’a drèssî l’ tauve avou on blanke mape. Dj’a faît sauteler l’ flote quand dj’a ètindu toûrner l’ clé dins l’uch. Nènète à moussî dins l’ bèle place. Nin one ouyâde dissur lès vêres à champagne. Nin minme on bètch ! « Dji t’ garantî qu’ c’èst vraî : dji so r’faît ! » « Jaki, dji m’èva ! » Èle s’a mètu à tchûler « Dj’aveû è l’idéye qui t’aleûs moru. » Èle m’a co dît qui s’ Jéjé n’ ratindreût pus qu’èle fuche vève. « Jéjé ?!!! » : on djon.nia qu’âreût p’lu yèsse si fî, qu’èle m’aveût prusinté on djoû come on soçon qui bouteût avou lèye dissu s’-t-ovradje ! » « Nos nos v’lans marier, il èst vèf. I n’ tèneût pus d’ su place di veûy qui v’s-alîz rastaurdjî nosse bankèt. » Dj’a sâyî d’ gangnî do timps tot li fiant à crwêre qui dj’aveû raconté dès crakes po lî fé plaîjî. « Po v’ dîre li vèrité, dji m’ va rademint r’trover dins quate plantches. Li médecin qu’ dj’a stî veûy, c’èsteût po-z-awè on radjou po m’ donner l’ bouyon d’onze eûres. Il a arindjî ça po dins quinze djoûs. « Tu m’ pourès co bin sopwârter quinze djoûs ? » « Jéjé à pièrdu pacyince. » « Dji n’ sèrè pus là po l’ Noyé ! » Èle n’a pus rin volu ètinde. Jéjé l’a v’nu r’qwaîre aviès méyenut. Mi cancêr à moru d’vant mî ! I-gn-a dès miraukes tos lès djoûs. Dji vike bin binauje. On s’ passe pus aujîyemint d’ Nènète qui di s’ vikaîrîye…