Novèles èt Binde à dèsséns/XXIV

Oufti !

2023. Volà d'abôrd vingt-ans qui dj' so-st-al pension. Mins nos minisses ni savenut pus èwou couru po trover lès liârds po mè l' payî. I vègnenut co d' vûdi leûs fonds d' ridant po ratraper lès manques dès toûrsiveûs banquîs. Il avîn' dèdja r'culé on côp l'âdje. On nè l' pleûve pus prinde divant 70 ans. Asteûre, po p'lu continouwer à nos lès payî, i vègnenut do ponre one novèle lwè qui nos va oblidjî à bouter co pus taurd, Vos m' conèchoz bin, mi, patriyote come i-gn-a pont ; minme si n's-èstans d'dja à Pauque, minme s'i-gn-a qu' po chîs mwès, dji m'a mètu au gârde à vous, li pôce su l' costeure di m' marone, èt m' prusinter po ossî. I m'ont acèrtiné qu'i m'èvôyerin' one convocâcion. Faut-i crwêre qu'il ont vraîmint dandjî d' mi èt d' caurs. Il ont stî rade, dji vin d'awè l' « Poney Express » avou one drole di lète à fègnèsse. Dji m' dimande bin... I-gn-aveût co por one eûre divant méyenut Dj'a drovu l'uch do botique avou m' drwète mwin, ègadjî m' tchèrète à rouwes dèl gauche tot 'squ'au comptwêr. Li vindeû m'a d'mandé : « Bondjoû Mossieû ; Qwè ç' qui dj' pou fé por vos ? » « Avoz dès carausses èt dès talonètes à fleûr ? » « Li vint sofèle dins lès-aubes di Sisafra ». « Dji v' ratindeûve, Mossieû. » Dji m'a r'ssatchî foû di m' tchèrète maugré mès rumatisses, m'avancî pa d'vant l'ome, èt m' tinre à li stapète qui stanceneûve lès montéyes : « Dès talonètes à fleûrs, po m' ragayî dins lès longouwès vièspréyes d'iviêr », lî a dj' rèspondu, tot clinçant m' tièsse su l' costé, agnî à p'tits bokèts m' lèpe di d'zo po lî mostrer qu'i m'è faleûve dipus, po claper mwins su mwins avou lî... I s'a faît mau d'on côp d'ouy à fé tchûler on tch'fau godin. Po qui ç' qu'i m' purdeûve ? Dji n'aleûve nin fé mârtchî avou lî sins conèche lès quèsses èt lès mèsses ! Po qu' djè l' veûy bin, il a stritchî on dwègt è l'aîr. Il a apicî one tomate foû d'on ridant, lî r'lèver li pus wôt possibe po mé l' mostrer come l'âreût faît on djouweû d' tènis', agnî on bokèt foû èt l' rid'chinde pa d'vant s' binète po l' goster ostant avou sès trôs d' nez qu'avou s' gâzi. Il a prins plaîji à m' rawaîtî po veûy s'il aveût bin djouwé s' role. Mi, dji m' dîjeû justumint qu'i r'choneûve come deûs gotes d'aîwe à Mossieû Lwèyal. « Dès talonètes à fleûrs. » a dj' dit tot ratchotant. Il a findu sès lèpes jusqu'a sès-orâyes. Maugré qu' dj'aveû dit ça sins-è ratinde one rèsponse, il aveût prins ça por one quèsse, èt tot r'ssouwant s' massale : « Mossieû va yèsse sièrvu, nos 'nn'avans r'çû d' totes lès coleûrs. On nos l's-a r'mètu dins-one bwèsse à lawêres au fin fond d'one tchêve à pèchons. Djè l'a mètu su l' costé por vos. Èlle èst su l' tauve dins l' place di d'drî. Si Mossieû m’ vous bin sûre ! » « Ouf ti ! » a dj dit. « Amèn ! » a-t-i rèspondu... Dji m'a rachîd, fé toûrner lès rouwes di m' tchèrète, èt sûre li vindeû dins l' colidor qui min.neûve pa padrî. « Vola, c'èst là. Dji m' vos va lèyî èt aler sèrer l' botique. Purdoz vosse timps. Quand vos-âroz faît, vos mousseroz foû pa l'uch di drî. Au plaîji d' vos r'veûy, Mossieû ! » Su l' tauve, i-gn-aveût one grande caréye bwèsse à cârau avou dès rodjes pèchons. Dins l' pârfond, one nwêre, pus p'tite di sclimbwagne su l' sauvion èt lès gravîs. Dji m'a r'lèvé, r'ssatchî m' casaque, rilèver mi mantche di tch'mîje èt plonker avou m' brès dins l'aîwe. Lès pèchons m'ont v'nu kèkyî, m' rifler, ça m' choneûve bon, mins i m' manqueûve bin vingt centimètes po djonde li bwèsse. Quéquefîye bin qu'avou l' tchèrète ?...Djè l'a rastoké al tauve, mètu l' frin, èt monter d'ssus. Dji pleûve apicî l' trésôr... Li frin a lachî, l' tchèrète a r'culé. Dj'a pièrdu m'n-aplomb, m' ratraper sins-î sondjî, avou mès deûs mwins su li d'zeû dèl cârau di d'vant. I s'a distatchî do rèstant èt sclater à mile bokèts dins tote li place... Dj'a chapé aus sclats d' vêre, mins nin à l'aîwe : trimpé come on satch di martchand d' mosses ! Dji m'a rastampé, apicî li p'tite bwèsse foû do sauvion. Djè l'a mètu su l' tauve. Cor on côp, grâce à ç' qui dj'aveû è l' tièsse, dj'aveû trové l' pîce po-z-ariver a satchî m' plan èt trover l' rèsponse à l'oucha qu'il avin' sèmé su m' vôye !... Come dj'èdaumeûve do m'ataquer al bwèsse, dj'a stî atauchî pas lès rodjes SDF qui wèspyin' come dès sots su lès tîlias. Dins l' cwane dèl pîce, i-gn-aveut on saîwè. Dj' a drovu l' robinèt tot laudje. Pont di stopa. Dj'a frèchu m' mouchè d' potche plôyî è quate èt l' sitinde su l' trô po qu' l'aîwe ni coûre nin. Èt, adon pwis, djè l's-a rèli foû dès sclats d' vêre, djè l's-a ramassé tortos, chaque à leû toûr èt l'zî fé goster leû novèle aîwe. Ça riskeûve do passer yute d'à ras', mins avou ç' qu'èsteûve dèdja al têre, i n' risquin' pus rin. 23 eûres 43. Dispeûy qui dj'aveû moussî è l' botique, c'èsteût pate à pate, dji n'aveû wêre boudjî d'on mète ! Dji m' dimandeû justumint si dj' n'èsteû nin on pau trop vî por one bèsogne come citèllâl. Dj'a rôlé m' tchèrète jusqu'al tauve, m'î achîde à m'-y-auje, rissouwer mès mwins, drovu mès lunètes su m' nez. Dj'a prind on biyèt d' cinq eûros, fin frèch, foû di m' potche, ricopyî si numèrô su l' loquèt à chifes. Li bwèsse s'a drovu. Tot èsteût d'mèré à sètch en d'dins. I-gn-aveût on envèlope tote riwède avou deûs fotos. Djè l's-a satchî foû èt lès mète à plat su l' tauve. Pa d'zo, i-gn-aveû one enrèjistreûr, on vî enrèjistreûr à binde come on s'è sièrveûve co dins lès-anéyes swèssante. Dj'a èfoncî l' boton « On' » po choûter ci qu'on-aleûve mi d'mander do fé...

Bondjoû Mossieû Mauj'ni. Po disfinde nosse façon d' viker, nos camarades Amèrikins nos-ont d'mandé d' lès-aspaler. I nè l' sârin' fé zèls minmes, èt nos, nos-èstans bin r'conu po nos-arindjemints avou lès Flaminds èt lès Brusselêr'. Ça sèrè vosse dêrin ovradje, vos ploz todi dîre : « Non » Mins, i-gn-a qu' vos po l' fé èt vos-aroz gangnî vosse pension po d' bon. Rawaîtoz bin l' foto d' l'ome, i s' lome Kadèr Apé. C'èst l' chèf d'one binde di tèrorisse qui d'morenut bin lon èt tos lès costés al fîye dins one cwane d'on dèsèrt d' Afrique, al frontiére do Yémèn' C'èst d' vèlà qu'il èvôye sès touweûs èmacralés dins lès faussès-idéyes qu'i prétche. Sins pont fé d' mau à pèrson.ne, vos-aloz waîti d' moussî adlé zèls po l'zî mostrer comint qu' nos vikans dins nos payis. Po voste ovradje, si vos l' voloz bin fé, vos-iroz monter on cinéma qu'on pout adjuster po l' mète dins leû tente.Vos prîyeroz totes lès p'titès djins, lès-omes come lès fèmes èt lès èfants po qu'i vègnenuche veûy lès DVD, qui n's-avans aprèsté avou dès sous-tites dins leû lingadje. Rin d' mau la d'dins, ça n'èst qu' dès vîyès comèdîyes tchantéyes, dès bèlès-istwêres qu'on mostreûve al tèlèvision dins l' timps quand lès cotes passin' co pad'zo lès d'gnos : totès paskéyes èwou qu' lès-Amèrikins ont todi one rôye d'avance su l's-ôtes. Atincion ! I n'èst nin quèstion qu'one faflote di ç' qui n's-alans vos d'ner, tchaîye dins lès mwins d' l'Omèrta, lès gabelous dès péres imam'. Vos v's-arindjeroz po fé dès sèyances d'one cope d'eûres divant prandjêre li prumêre samin.ne. Li deûzyinme, vos min.neroz dès forbatadjes avou chaque dès djins qu'ont vèyu lès films. Vos-èdaumeroz pa lès coméres. On v's-a aprèsté d'avance lès quèsses èt lès rèsponses qui vos d'vroz dîre po qu' nos plichan.ne sopèser comint ç' qui noste imaudje pôreût yèsse li bin v'noûwe adlé zèles. Vos l'zî froz comprinde comint ç' qu'èle ârin' bon à viker come dès-Amèrikin.nes. Sins rovî lès-omes, mins come di tos costés, c'èst todi l' feume qui pwate li culote dins l' min.nadje, bin adon, i sûront leû comére. One tote novèle tchèrète dèl marque « Rotsuto » po-z-aler dins l' sauvion, one machine po fé do courant èt tot vosse bagadje vos sèront parachutés quand vos sèroz su place. Li comére qui vos vèyoz su l' deûzyinme foto si lome : Jolîye Tèton. Èlle èst d'dja su place, èle vos ratind. C'èst lèye qui vos frè moussî amon lès djins, èt qui vos sièvrè po vos bin fé comprinde. Èle choûterè tot ç' qui v's-âroz à lî dîre, minme si ça n' sèreût nin d'assène. Èle sèrè à vosse sèrvice po rinde vosse vicaîrîye vèla li pus plaîjante possibe. Bon, dijan.n' todi qu'èle frè s' possibe ; i n' vos faut nin d' trop mète d'idéyes dins vosse tièsse non pus. Come todi, si l'Omèrta, tchaît su vosse dos, èt qu' vos-avoz yeû l' tièsse côpéye d'on côp sâbe, ou qu' vos-avoz stî touwé à côps d' pîres su l' place d'on viladje, nosse gouvèrnèment dîrè qu' on n' vos conèt nin. R'ssatchoz vos su l' costé, li bwèsse va s' distrûre di lèye-minme dins cinq sègondes. Nos-èstans avou vos di totes nos fwaces, qui l' Bon Diu vos tègne è s' choû èt l'Amèrike èto. Dj'a poussî su l' boton « Off » Dj'a r'ssatchî m' tchèrète su l' costé po n' nin yèsse jin.né pas lès fumêres. I m' faleûve rimète mès-idéyes à place. Ça m' fieûve plaîji qu'il avin' sondjî à mi po ç't-ovradje là après ostant d'anéyes à n' rin fé. Mins risquer l' vicaîrîye dès djins, rin qu' po leûs-imaudjes... Èst c' qui ça-z-èst valeûve lès pwin.nes ? I vikin' dèdja come dès sots po-z-aurder l' valichance di leûs dolârs, po-z-apicî tot l' pètrole qu'i-gn-aveût pa t't-avau l' têre. I-gn-aveût pus qu' su l' grocheû d' leûs djins qu'on pleûve co leûzi r'mostrer one saqwè sins awè l' ONU su l' dos. Qwè ç' qui ça catcheût co ? C'èsteût trop spès, ça m' choneûve drole... Yèsse tracassés pa leû-z-imaudje, zèls ? Ça m' doneûve do mau d' tièsse. Rin d' pus seûr qu'i-gn-aveût cor on gros qu'aveût pèter on câbe. Rin d' pus seûr qu'i r'montrin' co l'âdje dèl pension d' saquants ans po r'trover dès liârds : quatrè-vingt’ po lès coméres, quatrè-vingt cinq po lès-omes. Èt nos, dins nosse pitit payis : lès sûre lès-ouys sèrés come d'abitude ! Poqwè mi d'mander ça à mi, onk dès dêrins à co causer l' walon ! Dins nosse payis, jusqu'asteûre on-aveût todi faît lès paûrts, li pus gros bokèt po lès cias qui causenut l' flamind, on deûzyinme po lès Brusselêr' èt lès cias qui lawetéyenut l' francès, lès créces por nos lès walons. Èt on m' dimandeûve cit-ovradje la à mi ? C'èsteût co sûr dès-èmantchûres po n' pus d'vu payî lès pensions dès dêrins à co s' cobate one miète. On lès-èvôyereût s' bate dins lès payis ètranjér' èt n' pus jamaîs lès r'veûy ! Poqwè s' sièrvu d'on vî enrèjistreûr à binde dès-anéyes swèssantes, adon qu'asteûre, i-gn-aveût dès CD, dès MP4 èt dès p'tîtès-alumètes informatiques qu'on tchoukeûve dins l' cèrvia dès soûdârs ? Sins trop m' forbate, si dji n' vou nin m'èmantchî dins ç' bèsogne di sot là, dj'ènn'âreû d'dja on bon pris su E-bay d' leû-z-indjole à binde ! I-gn-a todi dès-amateûrs po dès vîserîyes qui rotenut co après cinquante ans. I m'aveû choné ètinde qui dj' pleûve rèfûser. « Vos ploz dîre « Non ! » Po-z-ènnè yèsse seûr, dji n'aveû qu'à r'bobiner l' binde. D'abitude dji n'a jamaîs dandjî dè l' richoûter on deûzyinme côp, mins là, ça sèreût l' prumî côp. Dj'a rèbobiné èt rèmantchî l' boton « On' » Dj'aveû bin sondjî : i-gn-aveût rin d' distrût. Dji poleûve co tot rètinde come divant, li poûre po scramer l' binde ni valeûve pus on poûri canada. Si dj'è rèchape, faurè qu' djè l'zî dîye qui leû-z-indjole èst passéye d'âdje. Dji m'a ratinri cor on côp su l' foto dèl djon.ne comére ; bèle come l'Avièrje, bin faîte di pates come d'orèyes. On lî âreut bin mètu ôte tchôse qui s'-t-âdje èt ôte paut qui su s' cârte d'identité. I m' faleûve ègadjî au pus rwèd... Asteûre, il èsteût trop taurd po dîre non. Tot èsteût d'dja dins m' tièsse. Lès-imaudjes si sûvin' dins l' pârfond di m' cèrvia su l' musique da Chuk Berry. C'èst come si one mwin aveûle âreût yeû craqué one alumète su l' mètche po l' fé couru. Dji m' raconteûve l'istwêre à mi-minme, dji trèvèyeûve dès sclats d' l'ovradje come il aveût stî faît : l'avion, l' parachute, li trèvautchadje do dèsèrt à dos d' chamau, tos nos plaîjis prins avou Jolîye Tèton su m' novèle tchèrète « Rotsuto ». Nos cwârps comachîs su l' sauvion. Nos copleûs sayant do r'tinre lès djins qui v'lin' broker d'zo lès tentes po-z-apicî lès bwèsses di coca zèrô èt d' mérote di mayis'. Lès visadjes dès-omes qui r'waîtin' li quatôzyinme bokèt d' « Police Académi IV ». Mi èt Jolîye pa d'zo l' tente (quéne ârsouye citèlla !) Lès Bédwines tchaîyants flauwes divant lès sin.nes di galafrîye. Li sûrprîje di l'ataque à tch'fau d' l' « Omèrta », lès-assotis d' l'imam'. Lès tièsses di mès mèyeûs copleûs tchaiyant dins l' sauvion d'on côp d' sâbe. Li Bon Diu qui choyeûve li dos d' l'Amèrique à côps d' picots... Li rèvèy s'a choyu d' saquants côps d' sonètes... Monique m'a arin.né : « Dji n'a nin sèré on' ouy, mins vos, vos n'avoz wêre taurdjî po ronfler, somadjî, djèmî, rîre èt pîteler tote li nut ! » Dji n'a rin rèspondu, mins dji m'âreû bin fordwârmu, dj'èsteû scran à tchaîr là !...