Novèles èt Binde à dèsséns/XXVI

Dësbautchance

Èle në comprind ni l’ mau qu’ ça m’ faît quand èle passe lë pîre dë l’ëch tos lès djoûs al nêt. Èle në sét ni qu’ djë d’mère achîd, tos lès djoûs dins l’ nwêr à waîtî l’ tévé. Mins djë nè l’ rawaîte quë d’on’ ouy, avou l’ôte djë tén l’ vôye à gougne. Djë n’ sé pës së dj’ so bënauje ou malèreûs, quand dj’ètind s’-t-auto qui rabroke dins l’aléye pa d’vant nosse maujone. Oyë qu’èlle èst là, mins todë mwins’ tos lès djoûs. Après avë stî taper on côp d’ouy à nosse crapôde, èle sëtaure tos sès lîves së l’ tauve dèl cûjëne, èt lès taper au laudje : t’t-ossë bén, qu’èle pourot co î èsse dins s’ grande sëcole, t’t-ossë bén qu’èle në r’lève jamaîs s’ tièsse djë dë ç’ qu’èle sëtëdîye. Dë passe më mwin dins s’-t-anète po l’ p’lë rapaujî. Djë lî dë qu’ nos pourîn’ fé branmint d’ pus d’afêres pus aujîye quë dë stëdyî dins dès vîs lîves. Èl sét bén dë d’ qwè quë dj’ vou causer. « Faut qu’ dj’achève à stëdyî m’ chapite. » Qu’èle më rèspond. « T’t-à l’eûre quéquefîye. » Mins d’ t’t-à l’eûre në vént jamaîs. Djë monte dwârmë tot seû. Bouter à boutësses èt plânerèsses, fé dè bèton, ç è-st-on’ ovradje dë djon.ne ome, èt më, djë n’ so pës së djon.ne quë ça. Ë m’ faut mès-eûres dë somâye po soyë sûre al bèsogne… « Të pièds pîds, Jacky » qu’ë m’a lancî l’ soçon quë boute avou më, l’ôte djoû après prandjêre quë dj’ sofléve come on boû po sayî dè l’ sûre. « Të d’vroz t’ trover one bèsogne d’achid’, quéquefîye bén sâyeû d’ payasse ! » Ël ont chëré d’ rîre tortos èchone. Lë Braîbant, po qui qu’ nos boutans, riyéve co pës fwârt quë l’s-ôtes à s’ chërer sès-abërtales : « Oyë l’ vî Jaki là, ël a cor one miète dë fwace è s’ capotëne. Ël a findë sès lèpes tote laudjes, mins dj’a bén sintë qu’ë-n-avot dès rëséyes dins ç’ qu’ë d’djéve ! « Oyë, Monsieû, » quë dj’ lî a rèspondë, « Èt djë n’a ni co trové m’ deûzyinme soflèt. » Monsieû Braîbant s’a r’mètë à rîre, mins dj’a bén sintë qu’ë m’ têreûve à l’ouy. Ça nè l’ jin.nerot waîre dë m’ doner mès yut djoûs quand djë n’ sârè pës satchî al cwade à s’ môde… Lès djoûs qu’ Fabiène së va coutchî à tote lès-eûres, djë n’ dwâme ni non pës. Adon, djë so nètî, odé mwârt dëssë m’ bèsogne. Djë d’mère là, rasta, dins l’ mwêreû. Dès mwaîjès-ëdéyes tounenèt dins m’ tièsse. Djë sondje à one saqwè qu’èle m’avot ramadjî, v’la d’dja one fameûse apéye, lë djoû qu’èlle a volë r’prinde sès stëdes : « Të d’vros yèsse bënauje quë dj’ sâye d’arëver à one saqwè dins nosse vëkadje. » C’èst ni come ça qu’èle lë sintéve, mins djë n’ poléve mau d’ m’èspêtchî d’ sondjî qu’èle voléve dîre : « Jacky, cë n’èst ni pace quë t’ n’î as ni rèyussë, qu’ më, djë dwè fén l’ minme ! » Dj’a co sondjî à ç’ qu’èle m’avot dët one ône djoû. C’èstot al Noyé, lë dêrëne anéye dë nos scoles. Sès parints èt sès fréres avîn’ dëdja r’gangnî l’ plantchî po-z-aler dwârmë. Nos n’èstîn’ pës qu’ nos deûs dins l’ canapé. Lès lëmîres èstîn’ tortotes sofléyes, à paurt lès lëmerotes dèl sapén que clëgnotîn’ come dès p’tëtès sëtwèles… D’avo d’dja drovë m’ bëstoke èwou qu’ë-n-avot on jëlèt por më. Dj’a satchî l’ bâgue foû dë m’ potche. Djë n’èsto ni à m’-y-auje, mins dj’a faît chonance dè l’ yèsse : mès mwins tron.nîn’. Nos-avîn’ dëdja causé mariadje dëvant, mins ça avot todë stî po pës taurd quand dj’aro yë trové d’ l’ovradje èt qu’ lèye ârot yë contënouwé sès scoles. Djë n’avo ni ausse dè ratinde ossë longtimps qu’ ça. Èlle a passé l’ bâgue à s’ dwègt, èle n’a minme ni rawaîtî qu’ cèstot dè d’mé carat. « C’èst qu’èlle èst bèle ! » a-t-èle dët. « Adon, c’èst oy ! » quë dj’a d’mandé. « C’èst bén seûr, c’èst ç’ quë dj’a todê volë, dëpës qu’ tot ç’ qu’ë-n-a au monde ! »… Adon, djë d’mère coutchî dins l’ nwêr dë m’ tchambe à r’mawyî mès sovnances. Dj’a bau yèsse dë l’ôte costé dèl mërâye come s’ë-n-arot one pwate de vère yinte më èt l’ tauve dèl cûjëne. Èt qu’èle sèrot sèréye dèl costé da Fabiène. On pourot t’t-ossë bén vëker, lèye è l’Ârdène èt më al mér, po ç’ qu’on èst co èchone tos lès deûs… On diamant, ça pout côper l’ vêre, parèterot-ë, mins djë n’è so pës së seûr quë ça. Dèl nêt, djë sondje quë dj’tchaî d’on’ aube. Djë sâye dë m’ ratraper aus coches, mins djë tchaî todë, todë, sins fén. Djë m’ dëspiète fén frèch èt djë pantë come on dëslachî. Më keûr bat së fwârt qu’on dîrot qu’ë m’ va potchî foû d’ më stoumak. Fabiène dwâme së s’ costé come one bén-eûreûse. Djë tape on côp d’ouy së m’ réguëlateûr. Djë vwè qu’ dj’ènn’-a cop or one dèméye eûre dëvant qu’ë n’ sone. De tote maniére, djë n’ dwamerè pës. Djë m’ mousse avou m’ vîye salopète èt djë trëbëke së l’ëch dèl cûjëne po-z-î passer m’ jate dë cafè… Lès lîves sont co staurés dëssë l’ tauve. Dès gros lîves, bén spès. Djë drove lë pës p’tët : « Lès stwèles d’ayîr èt d’audjoûrdë » Djë lî saquants lëgnes ; ça n’ vout jësse rén dîre. Minme lès mots quë dj’ conè në min.nenèt nëne paut. Ça pourot yèsse dès copëches quë cour’rîn’ së l’ tauve quë ça sèrot co l’ minme. Mins Fabiène, lèye, faut crwêre qu’èle comprind tot pësqu’èlle a todë dès « A » à sès controles… Djë djouwe avou l’ brëquèt qu’è-st-è m’ mins dins m’ potche èt djë sondje qu’on lîve c’è-st-aujîye à foute lë fè d’dins. Djë sondje quë së cénq mënëtes ça n’ sèrot pës qu’ dès scrabîyes quë pèrson.ne në lès sârot pës lîre. Djë m’ lève po n’ni oyë ausse dè tûzer d’ trop la d’ssës èt djë m’ va veûy à Céline quë s’a arindjî po taper djë totes lès couvèrtes dë s’ lét. Volà on mwès qu’èlle a abroké à scole po s’ prëmëne anéye. Mins por më ; dj’a bén è l’ëdéye qu’ë-n-a qu’on mwès qu’èlle à skèpî.

« Ça arëve bén sovint quë tot tchandje pës rade qu’on nè l’ pinse èt qu’on n’èst ni capâbe dè l’ sopwarter. » dëjéve-t-ë nosse pa. Vola quë dj’ vwè qu’ ça m’arëve èto. Chaque djoû, on dirot qu’ Céline à co crèchë… 

« Djë so-st-one grande fèye asteûre. » dë-st-èle à s’ mami, quë s’pète à rîre së l’ côp. Cët-anéye cë,djë l’a min.né më minme po s’ prëmî djoû dë scole. Ça n’a ni stî come po lë strëmadje à lë p’tëte sëcole quand nos l’î avîn’ amin.né. Èlle avot tchûlè sès-ouys tot foû, quand Fabiène èt më nos l’avîn’ lèyî là. Cë côp cë, èlle avot ausse dë r’trové sès camarâdes. Djè l’ tënéve pa l’ mwin quand nos-avans moussî è scole. One banceléye dë parints pèstèlîn’ po trover l’ banc d’ leû raupin avou leû nom d’ssës. Dj’a razouyî tot-autou d’ më : on nëd d’ wèsses aclapé au plafond èt dès rodjes pèchons dins leûs-aîwes dins l’ fond padrî lès bancs astok dë nosse bole dë têre. Dj’avo yë drwèt aus minmès-afêres vola combén d’ timps d’dja ? Së l’ëch, ël èstot scrît avou dès grandès lètes : vos-èstoz l’ bénv’nouwe è vosse sëcole ! « Ë faut qu’ vos v’s-ènn’-aloche, nosse pa. », qu’èle m’a dët Céline. Tos lès raupins èstîn’ achîds à leû place. Djë m’a rindë compte quë tos lès-ôtes pârints èstîn’ dëdja-st-èvôyes. Cë djoû là, dins nosse lét, dëvant d’ nos-èdwârme, dj’a dêt à Fabiène : « Ë m’ chone quë nos d’vrîn’ oyë on p’tët frére ou one pëtëte soû po Céline ! » « Auwe ; nos n’avans d’dja ni assez po l’ noûrë èt l’ rabiyî comëfaut ! » qu’èle m’a rèspondu. Nos-avans dwârmë à l’ôtèl dès kus toûrnés.-n-a one saqwè quë toûne è m’ tièsse dëpôy saquants samin.nes, djë mè l’ va fé audjoûrdë. Djë n’ sondje minme ni à pèser l’ pour èt l’ conte po soyë së dj’so së l’ boune vôye. Fabiène n’a ni co tourné s’ tchaur, quë dj’apëce lë broche à dint èt l’ pijama da Céline. « Nos-alans dwârmë adlé mami. » quë dj’ lî dë « Èt po lë scole, adon ? » « Djë passerè vos qwaîre dëmwin tot timpe po vos min.ner à scole. Dj’apwaterè vos moussemints. » « Djë so-st-oblëdjîye ? èle ronfèle ! » « Taîjoz vos, mètoz vos solérs, on-i va ! » Djë m’ènonde po lî dîre ça, c’èst bièsse, èle n’è pout rén l’ crapôde. Cë n’èst ni lèye quë m’ faît potchî foû d’ mès clëcotes. Quand dj’abroke adlé nosse man, djë lî d’mande së pardon po lès rûses quë ça lî va coster èt quë dj’ n’a ni yë l’ timps d’ l’advèrtë. « N’a-t-ë one saqwè quë n’ rote pës yinte Fabiène èt vos ? » « Non Man. » quë dj’ lî rèspond. Djë r’prind l’auto èt djë m’ dëspètche tot së rwèd quë dj’ pou jësqu’al fac do Noû Lovin. Djë trove l’auto da Fabiène, Djë va catchï l’ mëne one miète pës lon. Djë m’ dë è më minme quë c’èst d’dja comincî pace qu’ë n’a pëpont d’èlève dëssë l’ pârkin’. Ë n’a pont d’ gârde nérén. Dj’a bén è l’ëdéye quë ça va yèsse aujîye au d’la dë ç’ quë dj’ nè l’ pinséve. Djë prind m’ coutia d’ potche. Djê d’mère catchî l’ long dès fënièsses padrî one âye. Vos-l’-là, achide dëssës l’ prëmî banc qu’èle choûte èt scrîre tot ç’ quë l’ prof dët. Cë n’èst ni on vî baurbë, tot tchènë… Tot d’on côp, ë lache lë tablau, èt taurdjî d’ bèrdèler. Ë mousse foû dèl batëmint. Më, djë pinse qu’ë m’a vèyë. Djë m’achid à kë d’ poyon pa padrî on bouchon dë spënes quë crèche là, tot près d’èwou ç’ qu’ë dwèt d’naler. Djë m’aprèstéye à zoupler d’ssës èt li d’ner one tane qu’ë s’è sovêrè jësqu’al fén d’ sès djoûs, Ça n’ më dësrindjerot wêre… Djë n’a ni l’ timps d’ l’apëcî : ça va trop rade. Ë rote fén drwèt viès one blanke Kia quë taudje yinte më pick-up èt l’ Toyota da Fabiène. Ë nache së l’ banquète dë d’drî. Ë ramasse one brèssîyes dë lîves èt d’ papîs. Djë m’a ravancë à bachète po l’ p’lë apougnî quand ë passerè. Trop taurd. Dj’a sintë l’ sint-bon qu’ë mèt së sès massales quand ë fait s’ baude. Come s’ël ârot dandjî d’ ça po dès lèçons quë comincenèt al vièspréye… Qui ç’ qu’ë pinse què l’ pourot veuy voltî avou on parèy sint-bon ? Ë r’mousse adlé sès-èlèves èt dëstrëbouwer lès lîves. Fabiène toûne lès pâjes pontieûsemint come s’èlle ârot peû d’ lès veûy tchaîr à pouchêre… Djë m’ dë quë l’èst timps dë m’mète à l’ovradje, së dj’ vou achèver l’ bèsogne quë dj’ voléve vënë fé vécë… Djë m’ catche padrî l’ rouwe dë d’drî dèl Kia. Djë cwache dins l’ cawoutchou, bén pârfond, djësqu’à ç’ quë dj’ètinye lë chëflèt d’ l’aîr quë chîle foû. C’èst come së dj’ cotâyero l’ bênète dèl prof po qu’ë r’chone à dèl paille qu’a passer dins l’ machëne à bate. Autou dèl Toyota asteure… Vola, c’èst faît. Djë r’grëpe dins m’ pik-up, èt rademint èraler al maujone. Dj’a peû. Djë tron.ne come on fouya : poqwè ? Djë drove lë tévé, sins l’ soyë waîti. Djë ratind l’ côp d’ tèlèfone da Fabiène. À paurt qu’èle në tèlèfone ni. Së lècon d’vrot d’dja yèsse achèvéye dëspôy trwès quârt d’eûre èt djë so todë sins novèle… Ë m’ passe one ëmaudje dins m’ tièsse : èle n’èst ni tote seûle dins l’ pârkin’ Mins quéquefîye bén achid à one tauveléye dins on cabarèt avou s’ prof ou on gârdyin. Djë m’ dë qu’èlle a dès mëséres au cause dë ç’ quë dj’a èmantchî… Djë r’prin lès clé dë m’-y-auto, èt djë so à mëtan foû dèl maujone quë dès fâres m’asblouwëchnèt. Djë d’mère clawé së place. Djë n’a ni l’ timps d’è placer one quë Fabiène motîye : « Djë so-st-en r’târd pace qu’ë-n-a on d’mé cougnî qu’a crèvé mès bindeladjes ! » « Poqwè n’ mavoz ni tèlèfoné ? » « Lë gârde, s’a propôsé po tchandjï m’ rouwe, djë l’a lèyî fé. Ë valéve mia insë pëtôt quë d’ vos-oblëdjîz à vënë r’qwêre. » « Dj’a one saqwè à vos dîre. » quë dj’ djaurgone à bachète come on vî malâde. Fabiène n’ r’lève minme ni s’ tièsse, èlle èst d’dja aclapéye dins s’ lîve : « Dj’a trwès chapites à lîre, Jacky, ça n’ pou nin ratinde ? » Djè l’ razouye. Djë sé quë dj’ l’a pièrdë. Ë-n-a d’dja one fameûse apéye quë djè l’ sé… Quë dj’auye chèté sès pneûs n’ candj’rè rén à mès mëséres, sauf quë dj’ènn’ârè co d’ pës po sâyî d’oyë m’ crapôde avou më… « Ça pout ratinde, Fabiène… » Djë mousse foû èt m’aler achîre dëssë l’ tèrasse. Djë sint l’ sint-bon dès fleûrs dë sëcètes quë crèchenèt astok à l’ètang. Leûs-odeûrs remontenèt à mes narënes. D’abëtëde, ça m’ rapaujîye ; mins v’la, audjoûrdë… Dès guèrnouyes cwacléyenèt au lon, mins l’ naît èst paujêre come l’aîwe dèl vèvi. Ë-n-a tant dë stwèles. On dirot qu’èlle ont potchî foû pas l’ fond d’one passète po v’në dèssiner dès foûmes. Fabiène lès conèt par keûr tortotes cès foûmes là èt lès loumer chaque pa leûs noms. « Vos d’voz fé on sowai së vos vèyoz one sëtwèle fëlante. » qu’èle dëjéve todë nosse man, minme së dj’ n’è vwè ni one, djë m’ dëmande lë kénk quë dj’ fro. Cë qu’ë m’ vént è l tièsse, c’è-st-one sovnance d’avou Fabiène, Céline èt më. Céline n’èstot co qu’on paupau, èt nos -èstîn’ sëtèvôye po pikeniker së l’ rëmouye au bôrd dë l’ floye. On-èstot au mwès d’avrë, èt l’aîwe èstot trop frwède po p’lë bagnî. Ç’èst ni ça qu’arot p’lë m’ dësrindjî. Lë solia lûjéve. Lès cèréjîs èdaumîn’ à mostrer leûs blankès fleûrs èt nos-advënîn’ quë l’ timps s’aléve mète au bia. Céline fiéve dès bauyes po s’èdwârmë. Faviène l’a r’koukî dins s’ poussète. Èle s’a rachid d’ssë l’ mape sëtindoûwe al têre po mindjî. Élle a clincî s’ tièsse së më spale : « Djë vouro qu’ ça d’mère todë come asteûre. » qu’èlle a dët : »S’ë-n-arot one sëtwèle fëlante, c’èst seûr lë seûl sowaît quë dj’ fro. Èle m’a rabrèssî. On bètch quë m’ promètéve lë paradës po ç’ naît là, quand nos-arîn’ yë r’fachî Céline èt l’ mète dwârmë… Mins ë n’avot pont dë stwèles à prandjêre cë djoû la, come audjoûrdë. Tot d’on côp, dj’ a yë ausse quë Céline seûye vécë pace quë, adon, dj’aro p’lë r’moussî dins l’ maujone èt m’aler stinde astok da Fabiène. Èt djë passero tote më naît à rawaîtî së stoumak së solèver à chaque sofla. Ë-n-a one pëtëte vwè quë m’ cause dins m’ tièsse : « Faurè t’î abëtouwer, valèt. Ë-n-arèt on fameûs paquèt d’ naîts èwou qu’èle në sèrè pë al minme place quë twè. Quaquefîye bén èto dins one ôte vëladje. Djë lève on daîrén côp m’ tièsse viès lë stwèli, mins, ë n’a rén quë fële. Djë sère mès-ouys. Djë oude lë sint-bon dès rampioules. Djë faî chonance quë Céline dâme sëtindouwe tot conte më. Djë sondje quë Fabiène va rindjî sès lîves èt qu’ nos-irans dwârmë èchone. Djë m’ayince one sovnance po lès djoûs quë m’ ratindenèt bén rade…