Novèles èt Binde à dèsséns/XXXII

Mindjî lès djoûs

I n’a nin falu cinq minutes po qu’ tos lès botiques sofèlenuche leûs lumîres. Dji m’a achîd d’ssu m’ balcon po razouyî lès fouyas dès-aubes trianer au vint. Dji n’ mi coukerè nin d’vant l’ piquète do djoû. Dji n’ so pus oblidjî di m’ rilèver tot timpe. Li banse di liârds qu’on m’a d’né quand dj’a stî tapé à l’uch, ramwinrî à p’tits côps. Dji pinse qui dj’ènn’arè cor-assez po p’lu ténre deûs ans. Après, dji mètrè m’ maujone au clô. Dji vindrè lès portraîts, lès posteures èt lès clicotias d’ôr qui mès vîs parints m’ ont lèyî dins leûs-èritances. Quand dji n’arè pus rén qui vaut co l’ pin.ne d’yèsse vindu, quand m’ compte al banque sèrè r’clôyu pace qui dj’arè tot r’ssatchî d’ssu à fraude, dj’irè stinde mès paumes dins m’ famille. S’i m’ faut m’î plinde ; dji m’ plindrè ad’lé zèls po-z-awè deûs-eûros po p’lu mindjî. Mi plaîjî ; c’èsteût d’ bouter, fin binauje. Dji fieûve l’ovradje d’on’ injénieûr, on p’tit capitin.ne d’one èquipe di qwêreûs. Dj’èsteû fièr’ d’yèsse al tièsse d’one dîjin.ne di djins, tortos pus calés qu’ mi, avou dès diplômes raflés dins lès pus wôtès s’coles. Bin sovint, dji d’veûve mi mwaîjeler sur onk ou l’ôte djon.ne injénieûr civil. Èt li satchî lès-orâyes come à on scolî. L’ usène à drogues a discrauchî… On mwès pus taurd, on-z-a règadjî… Ci n’èsteut jusse qu’one maniére dès liquider lès pus vîs qui costîn’ trop tchèr à payî, lès fwatès tièsses, lès sins choûtes, èt lès cias qu’avîn’ sitî malâde di pus d’ trwès djoûs par an….

   • Ci qu’èst da vos, vos ratind divant l’uch po-z-èrâler. Dji v’ sowaîte di r’trover d’ l’ovradje.
   • Dji n’ bouterè jamaîs pus.
   • Waîtîz à vos.

Li DRH (Dirècteur dès Rècours) n’a nin comprins qu’ dj’aleû prinde dès condjîs amétèrnam... Dji dwâme dins li station. Dji m’ pormin.ne avou one soçone, qui vike come mî. Quand i plout, on mousse dins on muséye. Di l’èsté, on-z-a profité qu’i-gn-aveût on camion qu’avoz l’ tape-ku au laudje po monter d’dins èt î cougnî rade faît. Ça m’a bin faît plaîji, mins dj’a è l’idéye qui ç’ sèrè po l’ dêrin côp. Dji n’a pus dandjî d’ ça. Dji vike, dji razoûye, dji tanfèle, dji so ; v’là ç’ qu’il a dît l’ Djâke Spîre… Dj’ènn’a co po saquants-anéyes come ça, après, on vwèrè l’ ku do satch. Dji veû èvi l’idéye di m’ touwer, minme si l’ rèvolvêr qui dj’ catche padrî one planerèsse dins l’ murâye do ç’mintîre, èst là mètu po m’ trawer l’ tièsse. Viker laudje, paujêre, sins mindjî mès djoûrnéyes. Prinde lès-eûres come èle vègnenut, dins mès paumes come on p’tit mouchon, po qu’èle ni rèvolenuche nin trop rade. Prinde lès minutes dissu m’ linwe, lès sucî sins-i mète mès dints. Chiquer l’ goût dès sècondes sins rovî qu’on vike. Dji stindrè lès-anéyes qui m’ dimorenut come on filé d’ suke d’one baube à papa, èt lès cover dès ra-z-ans… I-gn-a pupont d’ vint. Lès fouyas n’ trianenut pus. Pupont d’ brût. Li nut trin.ne li savate, londjine, s’èdwâ… Li brune divint nwâre. Dji n’a nin ausse qui l’ djoû s’ lève po m’ riprinde mès-eûres tot brichôdant m’ vikaîrîye. S’i-gn-areût moyin, dji rastaurdjîyereû l’ piquète do djoû…