Novèles èt Binde à dèsséns/XXXVIII

Dji vos l' di insi... è passant

Èle ni m'a jamaîs rin d'mandé, èt mi dj'aveû tant bribé ! ... Dji vikeûve dèdja avou s' matante qui m'aveût dit : « Audjoûrdu, nos-îrans veûy mi nèveûse à l'ospitau. » Djè l' riveû co, ç' djoû là, alanyîye dins s' lét. Ça m'aveût tchaît d'ssus come on côp d'alumwâre. Dji r'vèyeûve li djon.ne comére qui dj'aveû d'dja rèscontré dès-ans èt dès razans d'vant, dins l' rèstaurant qu'èle tineûve avou s'-t-ome d'adon. Ça n'aveût stî qu'one ouyâde, mins dj'ènn'aveû r'ssinti l' fè dins l' pârfond di m' coûr. Èt vo-l'-ri-la. I-gn-aveût pus qu' lèye dins l' tchambe, dji n' vèyeûve pus qu' lèye. Quand dji m'a clincî po lî d'ner on bètch, li song boleûve dins mès vwin.nes. Dj'a yeû sogne qui mès lèpes ni brulenuche si massale... Dj'aveû bau mi r'vindjî, n' nin z-î sondjî, il èsteût trop taurd ! Si-t-imaudje èsteût clawéye è m' tièsse. Rimètoûwe su pîds, dj'a balziné dès mwès au long divant d' wazu l'atauchî. Tot ç' timps là, dj'a aprins tot ç' qu èle aveût d'vu viker : tapéye là pa s'-t-ome. Tote seûle avou sès trwès-èfants, èle s'avot d'né al prumî v'nu po polu lès-èlèver. I lî ènn'aveût co faît on quatyinme. Li pus vî d' sès fîs aveût sti touwé dins on acsidint d'auto : li pus grand dès maleûrs por one man : piède on' èfant... Dispeûy adon, i-gn-aveût pu rin po l' acsûre... +++ Djè l’aveû d’dja vèyu quand i t’neûve co cabarèt do costé d’ li stâcion. Si feume l’a tapé à l’uch on côp qu’ sès-èfants s’ont mètu à min.nadje. Asteûre, il è racoplé avou m’ matante. Citèllale, i n’ lî a wêre falu d’ timps après l’ mwârt di s’-t-ome po-z-è r’trover onk ! Èt volà qu’asteûre, èle vint mè l’ prisinter come s’èlle âreût tchaît su l’istwèle à quèwe. Mins i-gn-a seûr one saqwè foû sqwêre, pace qu’i m’ rilouke come on tchèt après one soris, qui dj’ènn’a m’ coûr qui bat come on mauvî. Mi-y-ome, ci n’èsteût qu’on laudje divantrin sins cwârdia. Il èst pus sovint stindu coutchî qu’à l’ovradje. Asteûre, i vint di s’ blèner à s’ dos. Dèdja qu’on-z-a tant d’ mau po nos fins d’ samin.nes ; ç’ n’èst nin co ça qui va arindjî lès bidons ! Come ça lî va one miète mia, mi matante a v’nu lî d’mander po-z-aspaler s’-t-ome dins sès toûrnéyes. I l’ vêrot qwêre èt l’ ramin.ner. I sèrè t’t-à l’eûre pus sovint véci qu’à s’ maujone… +++ Èlle aveût pièrdu l' fris' di s' djon.nèsse, mins s' biaté aveût gangnî d' l'acèrtinance. L'idéye qui dj' m'ènnè fieûve ; dji n'âreû soyu mète on nom la d'ssus. On' aîr qu'è rid'mande, qu'on n' sét bachî sès-ouys, qu'on l' pwatereût au ciél, qu'on n' sareût qu' bèyî après lèye... +++

I n'a rin d' pus qu'on' ôte, mins i s' sogne bin. Il èst r'mouwant come pas deûs. I sét causer. I m' sét fé rîre. I n' pièd jamais on djoû. Tot-a faît l' contraîre di c' qui dj'a al maujone… +++ Vola, djè lî a dit tot ç' qui dj'aveû dins m' coûr. Qui s' matante ni voleûve pus qu' djè l' djonde, qu'èle n'aveût pus l' santé. Qu'a nos-âdjes ça n' richoneût pus à rin. Qwè raconter d'pus ? Dji n' sé minme pus comint qui dj' m'î a prins. Dji n' lî a nin dit qu' djè l' vèyeûve voltî. Dji n'a nin yeû dandjî d' lî dîre. Dj'a vèyu dins sès-ouys qui là lonmint qu'èle saveût. Èlle a minme sayî di m' distoûrner di ç' qui dj' voleûve, èt m' rèvôyî à m' min.nadje... Dj'a rataqué l' lèddimwin. Dji n'âreû pus soyu m' rastinre. Si dj' m'è sovin bin, dj' li a d'vu dîre qui n's-èstîn' byin maleureûs tos lès deûs chake dins nosse cwane. Qui nos frin' bin do prinde tanawète condjî èchone, rin qu' po nos rècoradjî, rin qu' po nosse santé... +++ Dji sinteû bin qu' ça d'veûve ariver. I n'a wêre balziner po mè l' dîre ci qu'i vleûve. Dj'a sayî dè l' distoûrner. Li causer di m' matante. Minme s' i paumeûve après mi, qui ça n'amin.neroz rin d' bon. Poqwè n'a dj' nin soyu r'fuser tot sètch ? I saveût bin qui dj' sèreu tote seûle li lèddimwin. Il a promètu di m' vinu qwêre.... S'i n' vint nin, nos-è d'mèrrans là, mins s'i vint, dji sé bin qui dji n' sârè dîre non... Dji m' va aprèster... +++ Dji n’a nin yeû à ratinde, èle mi ratindeûve… I m’ choneût qu’èle pèseût l’ poûr èt l’ conte. Mins dj’a comprins al maniére qu’elle a rarindjî sès tch’fias èri d’ sès-ouys d’on côp d’ tièsse, à sès lèpes findoûwes au d’là, à one saqwè d’ si fin qu’a passé yinte nos deûs, qu’èlle aveût prins s’ dècision, sins r’nicter, sins r’grèt. Èle s’aveût arindjî au mia… +++ Èt nos-avans stî nos racwètî maugré qu' nos savin' tos lès deûs qui nosse rote ni min.nereût nune paut. Nos n' savin' pus qwè fé. Nos-avans co bin balziné lonmint d'vant ç' qu'on pèyeûve après. À bin-z-î r'waîti, i-gn-aveût one saqwè d' choquant, portant nos-avans prins nosse plaîji jusqu'à piède alin.ne. Nos-avans poûjî à tos lès djeûs. Nos-èstîn' su l' minme mèsure. C'èsteût on mirauke !... +++ Nos-avans couru totes lès pissintes, totes lès chavéyes, tos lès léts. Nos nos-avans vèyu voltî dins totes lès cwanes, mins nos n' wasin' riconèche li place qu'on purdeûve, pate à pate, onk po l'ôte dins nosse coûr, dins nosse tièsse, dins nosse cwârp. Combin d' côps avan.n' dit : « Qu’i nos tchaîye do mèyin, ci qu'on-z-a yeû, on n' nos l' ripudrè pus ! » +++ Dji n' sé nin si c'èst l' minme por lèye, mins èlle a prins tote li place dins m' coûr. Djè l' va r'trover tant qui dj' pou è s' maujone ; tant qu'i-gn-a moyin. « C'èst co véci qu'on-z-èst l' mia ! » di-st-èle. Dji sé bin qu' mès fwaces taudjeront pus rade qui lès sènes, qui dji n' wâze lî dîre qu'i-gn-a pus qu' lèye qui compte è m' vikaîrîye, qu'èle riçûrè m' dêrin fè !... +++ Dji ratind qu'i vègne come jamaîs. Quand nos n' sârans pus op', nos nos stindrans onk non l'ôte, à nos raconter qui n's-èstans mia qu' bin... +++ Èle mi rabètcheûve di plaîji quand l'uch s'a tapé au laudje... +++ Èle ni m'aveût jamais rin d' mander, èt mi dj'aveû tant bribé... Èle m'a tant d'né !...