Dj’a r’trové l’imaudje d’on gros lîve
Mostrant l’trèvint qu’ lu p’tit Jésus
D’vins ses d’hirrîs lign’rês djambîve
One noûlêye d’andjes volèv’ disus,
L’Efant dè Cîr, foû du s’ djèrnêye
Astitchîv’ su rôsé piquet
Quu l’païne, lu Vierge, adjunèye
Rafulév’ du s’vwèle à piquets.
Saint Djôsèf aveut pris, comme bance,
Lu batche dè stauve avou des strins.
L’Efant fév’ risète al sofrance
Coukî tot au long so ses reins.
Treus rwês v’nît dè fin fond dè monde
Po bauhî l’ front dè Rwè d’les rwès.
Et l’hopê d’bierdjis v’név’ s’y djonde :
Crèyant l’Andje, i-avît houté s’vwè.
Lu steule dôr awètiv’ po n’héve
Dè teut dè staûve et d’név’ du djoû.
Po reshandi l’Efant, hanséve
L’halènne d’on augne, l’halènne d’on boût
Aux hommes qui n’avît pus nole aûme,
Jésus v’néve aprinde one lèçon ;
Ossu so s’ boque douce comme dè l’ laûme,
Nu s’pleutiv’ nin l’pus p’tit lèpçon.
Qwand dju r’trova l’imaûdje dè lîve,
Lu pus djônne du mes p’tits peukèts
Duvins s’ bance riév’ et djambîve ;
One crale moussîv’ fou du s’ bonèt.
Et come dju loûkiv’ ses fossètes,
Et ses ouyes du cîr — vérité ! —
Dju v’ s’ èl rabressa-st-à picètes,
Tot comptant qu’ dj’esteus-st-al Noyé.