O ! vos, lourds tchéns di patriyotes,
Estîz vs el five ou n’ voeyîz vs gote,
Sint Medåd vs aveut i troublé,
Ou l’ diåle vos aveut i shoflé,
Cwand vos schoûtîz ces shijh canoyes.
K’ ont l’ coir pouri disk’ ås tripayes,
Ki, po s’ riploumer, s’ aritchi,
Ont vindou et rwiné l’ payis ?
Ki n’ avîz vs tertos l’ gueuye colêye,
Cwand vos breyîz tote li djournêye
" Vive Tchestret, Lassince et Fåbri,
Cologne, Bassindje et Djhan l’ Banslî !
Vos årîz bén mî fwait do braire
Ki l’ diåle les hertchaxhe e l’ infier,
K’ avou ses grifes, e trô d’ leu cou,
I fjhaxhe moussî do plonk fondou !
Les araedjîs avou leu påye,
K’ i lomèt d’ Fexhe et ki l’ diåle åye,
Cisse påye ki, dispoy deus troes ans,
Fwait setchi les ptits et les grands,
Cisse påye, ki dji lome on tchinisse
Di chagrin m’ a fwait vni l’ djaenisse !
I prometént, les må-saives tchéns,
Ki totafwait sereut po rén,
K’ on rnacreut sol tchampinne et l’ rosse,
K’ on n’ magnreut pus k’ do souke al loce,
K’ on metreut djus tos les impots,
K’ on sereut cwite di s’ casser l’ cô,
Ki ci n’ sereut k’ djoye et liesse,
Ki tos les djoûs serént des fiesses…
Mins dispoy k’ i nos ont rnovlé,
On-z est dijh feyes pus afamés !
Divant çoula, dj’ aveu del bire,
Do pan, do lård et des crompires ;
Dji vikéve assez oniesmint
A poirter des saetchs so mes rins ;
Dj’ aléve tos les djoûs al taviene
Boere ene cwåte avou nosse Djihene.
Mins dispu k’ nos ont rbatijhî,
A poenne a dj’ do pan a magnî.
Mi feme a vindou totes ses cotes :
Ele n’ a pus k’ deûs ou treûs clicotes.
Mi djuståcoir est å lombård,
Et dji prevoe k’ on pô pus tård,
I m’ fårè-t aler so l’ viyaedje
Briber, fé des honteus messaedjes,
Po ramexhner kékes brikets d’ pan
Po noûri m’ feme et mes efants.
Çou k’ est pés d’ tot, c’ est k’ å botike,
Vos n’ årîz nén credit po ene fike.
Tot l’ monde djemixh, tot l’ monde si plind,
Nosse veye est pés k’ å monumint.
On n’ a pus ni plaijhi ni djoye ;
On n’ oize shofler avå les voyes ;
On-z est pinsif, trisse et peneus ;
On n’ voet k’ des vizaedjes påles et bleus.
On sohaite ki ces åmes dånêyes,
Totès shijh, a tchinne, atelêyes,
Soeyexhe hertcheyes e nosse martchî
Po-z aveur leus oxheas cfroxhîs.
Dji n’ di rén, mins ki l’ diåle mi bote,
Si dji n’ vindreu[1] mes deus savates
Po boere on bon côp à l’ santé
Do bôrea ki ls åreut stronné.
Alez, tos vos, gueus d’ patriyotes,
Ki l’ diåle vis dschite et k’ i vs dicrote !
On djoû vénrè ki vs payroz bén
Di nos awè dné tant d’ tchagrin.
Vos volîz haper l’ årdjintreye
Di Sint-Lambiet et d’ tote li veye :
Nos vs vierans, on djoû, del tonire,
Froxhîs, ou broûlés d’ l’ aloumire !
- ↑ Li DIE (vindéve) del mwaisse modêye est replaecî pa on condicioneu (vindreu), pus corant e rfondou, et mostrant mî li nén-reyelté del fråze.
Li riscrijhaedje e Feller est eplaidî dins l’ livret del sitroete plake « Cwatru-vint-nouv ».
Li rfondaedje a-st ataké so l’ L’ Aberteke, diviè 1999 (disca « A poenne a dj’ do pan a magnî ») pu a stî tot scrît cial e 2021.
L’ eredjistrumint del paskeye diné dins l’ sitroete plake est oyåve cial dins l’ accint d’ Lidje.
Lijhoz eto les pondants et djondants so Wikipedia.