Lès preumîres ustêyes k’ont ègzisté po z’atèrtèni lès patures, c’è stî la fotche èt la choupe di flates, la preumîre po lès stâré èt la deûzime po pwarté a mîtan d’ l’aclôs lès flates k’èstint podrî lès hayes vîves. Vos z-avîz avou la fâ po côpé lès tchèdrons, lès kichâdes, lès pâdrônes, èt pus rârmint dès fètchîres, èt on fièrmint po côpé lès gnèsses. Po r’lèvé lès bîs, on s’ sièrvot dol cougnêye di pré èt dol fotche.
Atoû dès anêyes 1925-1930, li constructeûr Labêye a Forêt-Trooz, è fabriké one pitite dèboûseûse a mwins, ki stârot one flate a côp. Mès Cisse machine la rotot a l’ôle di brès. D’ocâzion, èle ave costé 100 Fr an 1936. Mi fré Roger èt mi, dj’ ènn-ons stâré dès flates avou c’t-afêre la ! On fzot dès trin.nèyes di 20 a 30 m, an z-alant d’one a l’ôte, èt on z’êmot tant !!!
Tos lès ds k’èstint atèlés, avint on houyeû po hîrtchi lès patures, po stâré lès flates èt lès formoûjes. Li houyeû èstot fét, soit’ d’on ancâdreumint di gros bwès scwârés ou di treûs ou cink bindâdjes di roûes atèlés intèr zèls : deûs d’vant èt onk podrî, ou bin treûs d’vant èt deûs podrî. Dès ôtes avint dja on hèrse-tchin.ne po râyi l’ mosrê, staré lès formoûjes èt lès cous d’ flates al St Rmé ; kékes markes : Albert, Nickelman, Esde, Drago, Falisse.
Lès régénérateûrs di patures avint dès longs coûtès po z-aêré l’ wèzon.
Lès dèboûzeûses ont fét leû z’aparicion intèr lès deûs guères probâbleumint, mês adon, c’èstot po lès tchfôs. Lès constructeûrs Aléa, Laêye, Bottin èt dès ôtes dol réjion hèrbajère, èstint dins lès preumîs so l’ martchî. Po lès ôtes on pout cité : Albert, Raskin, Joskin, Nickelman, Palm, Progrès.
Brâmint dès cultivateûrs ont fét dès stâreûses di flates avou dès gros pneus d’ camion, sins teûye métalike, côpés a deûs, èt r’loyis intèr zèls par dès gros crotchèts d’ fièr. Avou ça i purdint cink ou chî m di lâdje. Po z-atèlé, azès tracteûrs, lès fabrikants ont monté lès machines trin.nées ou pwartées todi pus grandes, po z-arivé a çu k’on vind âdjoûrdu.
Dins l’ tins lès djins drin.nint lès prés k’èstint l’ pus près dès cinses ; al plèce dès twyiôs, i mètint dès p’tits pakèts d’ clèpères assé k’twardous, po fé ofice di drin d’vant d’ ramblèyé. Lès tins èstint durs.
Po z-atèrtini lès hayes, on s’ sièrvot do martê, dès trivwèsses, dès clames, dol masse èt dol hamède, do tire-djâle èt d’one tchin.ne po tinklé lès fils di ronche, dès pikets èt dès pîces di sapin po fé lès boutants.
Après l’ofansive Von Rundstedt, swite al guère, i gn-ave pénurîe d’ fils di ronche, èt on nos z-è v’ni vinde dès gros rôlès d’ fil barbelé d’acî nin galvanizé. C’èstot do r’ssôrt, èt lès fils èstint copIés par deûs avou one agrafe tos lès deûs mètes k’i falot côpé â burin. C’èstot one ovradje di démon po r’fé lès hayes avou c’ matériô-la d’ récupéracion dès ârmées, k’èstot dandjreûs a placé.
Après la guère di catôrze, cand on z-è ataké a fé dès hayes âtou dès aclôs, on z-utilizot do rond fil, di poûr ki lès tchfôs ni s’ blèssinche èt n’ atrapinche li tétanos.
Po lès hayes vîves, on purdot la cizète di haye èt l’ gros sécateûr. Pus târd, lès cizètes di haye élèctrikes èt a èssence ont spârgni brâmint dès pônes.
Dins lès anèyes cinkante, lès clotures élèctrikes ont arivé dins l’ comèrce, çu k’è s’pârgni brâmint dès eûres d’ovradje èt dès mètes di fil di ronche. On z-ave li chwas intèr lès aparèys so l’ rézô ou so pile : Halt, Nervus, Ako, Lacmé, Philips, Woseley, Vannier, Utina, Champion, Koltec, Jupiter, Horizon, Clipvac, F.N., Gallagher, Lucifer, Atomic, …