Nenni savez, merci, vos estez bin bonne ; mins ji vôreus bin v’dimander èco on p’tit siervice.
Allez, allez, voèsène, ni v’geainez nin.
J’esteus prète à scrire ine lette à mi-homme, qwand tot prindant l’coq’mâre qui hoûzéve, jus d’li stoûve, i m’sipitte dè l’bolante aiwe so l’main et ji m’broûle comme vos vèyez ; comme ji sos novell’mint abaguêyeie chal à Vastîfrotte, ji n’a co fait k’nohance avou personne, nin même avou mes voèsins, et, c’est cial qui ji sos v’nowe li prumîre et po l’prumîre feie hoûie.
Vos savez di lisquélle manîre ji m’a présinté d’vant vos, ji v’s’a quâsi fait happer n’sogne…
Jè l’creus bin, ji comptéve qui l’feu esteut st-ès l’mohonne.
Il est st-ès l’mohonne ossi, mins ès li stoûve et, c’est câse di çoula, qui j’sos broûlêye et qu’j’a st-accorou sins nolle façon, vis d’mander dè s’cours, ossi j’espére qui l’joû qui vos ârez mésâhe d’ine saqwè, vos n’roûveierez nin qui vosse voèsène Bertine est prète à v’payî si dette di rik’nohance.
Kimmint !… On v’nomme Bertine ossi vos voèsène ?
