Les autes, comme li p’tite et l’ grande Nâssârowe, ristopaies asteure, n’estît qu’ des mâssîs trôs; dè même qui drî Saint Phoïen qui v’néve si rinde so l’ laide et anoïeuse plèce Grétry, divant l’Hospitâ d’Bavîre, wiss’ qui des marchandes di frûtèges et d’boukettes à n’cense, dizos des hoïous paraplus ou des teutais d’ teule di pakk’, clawaie so quéques âlons, vindît, sorlon l’ sâhon, des gruzalles vettes, maweures ou faukakes, des roïâtes, des griaînes, des peures di suçâtes, des bilokes, ou akouftaies divins n’ grande chabrake ou n’ cotte di moutonne tappaie so leus reins (è herpe), châffant à patârs les michots d’ leus jambes dizeu l’ covet rimpli d’ roges bruzis, des pommes di rainette, di capindou, des geies, des marrons d’ payîs, des neuhes di lombardisse, des messes, des peures di France, des krettes di miches et tot l’houdin ; j’y veus co Mareie Sonneû avou ses boukettes âx chikes, qui nos fît tant gaiver et, si n’s avîs l’aweur dè poleur enn’ achter, qui n’ hagnîs d’vins jusqu’âx oreies â risse dè hochî nos dazos.
Li rowe Saint z’Elôïe, tote sitreute et crâwant vès li d’gostant Sâci, qui leyîve veie les drîs des minâbès d’meûres dè l’rouwalle dè Curé, ou dè l’Cour, asteure li rowe di Bavîre et li k’minç’mint dè l’rôwe Sûrlet, à l’anglaie dè câbaret à l’essègne dè Blanc Ch’vâ et dè l’ mohone di mons Lepième, hoûïe li grand Café dè l’ Cour.
Adon v’nît les ponts d’ Saint Nicoleie et d’ Saint Julin et les jènès aiw’s qui passît d’zos, pleintes di
